Meet the Parents (2000)

Ég ákvað að taka þessa mynd eftir að ég var búin að sjá allt annað og því þetta voru ein af uppháhaldsleikurum hjá fjölskyldu minni. En með mikla ólund ákvað ég að horfa á hana líka en viti menn þá var þetta allveg príðismynd. Ég bjóst ekki við svona mörgum góðum atriðum þannig að maður liggi í krampa yfir henni. ég get bara sagt þetta er góð mynd fyrir alla og hafið gaman að því að sjá hana.

Meet the parents er frábær mynd sem ekki verður slegin út í bráð. Robert De Niro var alveg yndislegur í hlurverki sínu. Og ekki var Ben Stiller verri. Ég verð að játa að mig langaði ekkert mjög að sjá hana fyrst en bara á fyrstu mínútunum breyttist það viðhorf. Og ef einhver vill liggja í hláturskasti í dágóðan tíma þá mæli ég með þessari mynd.

Mér fannst myndin nokkuð hlægileg á köflum en hún fékk mann ekki alveg til að hlæga nógu mikið í hvert sinn. Hér segir frá mjög misheppnuðum náunga (Ben Stiller úr There´s something about Mary, Keeping the faith) og kröfuhörðum faðir (Robert de Niro, Flawless, Analyze This, Ronin). Ágætis fjölskyldumynd fyrir þá sem vilja mynda alvöru fjölskyldustemningu.

Virkilega skemmtileg mynd. Þrælgóður húmor og allur leikur til fyrimyndar. Gamla brýnið Níró er samt langflottastur hér hann klikkar bara aldrei. Yndisleg mynd, tilvalin fyrir alla fjölskylduna.

Meet the Parents er um mann sem fer til foreldra kærustu sinnar eina helgi til að biðja um hönd hennar. Han er þar eina helgi og á meðan gerast ógleymanlegir atburðir. Robert De Niro er frábær í þessari mynd. Ég mæli eindregið með henni því hún er þokkalega fyndin og skemmtileg.

Kvikmyndin Meet the Parents er ein af bestu gamanmyndum ársins 2000 og það er erfitt annað en að veltast um af hlátri, enda er hún alveg frábærlega fyndin í gegn. Hér segir af hjúkrunarfræðingnum Gaylord Focker (Ben Stiller) (sem vill endilega láta kalla sig Greg!). Hann hefur í hyggju að biðja unnustu sína, Pam Byrnes um að giftast sér. Þegar hún segir honum að faðir hennar ætlist til þess að verða spurður um hönd hennar ákveður hann að nota tækifærið er hann og Pam fara í helgarferð til foreldranna til að verða viðstödd giftingu systur hennar, til að biðja hann um samþykki föðurins, Jack Byrnes (Robert De Niro) á ráðahagnum. En þegar á hólminn er komið breytast aðstæður verulega. Jack er vægast sagt lítið um Greg gefið og gerir sífellt lítið úr honum, starfi hans og eftirnafni hans! Auk þess dásamar hann fyrrum kærasta Pam og gerir Greg þannig enn erfiðar fyrir. Þar sem Greg er staðráðinn í að fá samþykki hans reynir hann að sýna sínar allra bestu hliðar til að komast í mjúkinn hjá föðurnum og móðurinni (Blythe Danner). Allar þær aðgerðir misheppnast herfilega (vægast sagt) og koma honum í sprenghlægilegar aðstæður. Framundan er hræðilegasta helgin í lífi Gregs og ekki batnar ástandið er hann kemst að því að Jack er fyrrum CIA-leyniþjónustumaður sem lumar á lygamæli í kjallaranum, en það er bara byrjunin á ógleymanlegri helgi sem verður stöðugt verri og verri..... Myndin er endurgerð samnefndrar kvikmyndar frá 1992 þar sem Greg Glienna lék hlutverk tengdasonarins en hann er einn framleiðendum þessarar myndar. Meet the Parents var tilnefnd til Óskarsverðlaunanna 2000 fyrir besta kvikmyndalagið (A Fool in Love) en það er höfundurinn Randy Newman sem syngur það og gerir það vel. Þetta var 14. óskarsverðlaunatilnefning hans og hann er vel að þessari tilnefningu kominn. Óskarsverðlaunaleikarinn Robert De Niro (The Godfather Part II, Raging Bull) fer á kostum í hlutverki hins vægðarlausa fjölskylduföður og tengdapabba og túlkar hann frábærlega. Hann hefur ekki verið betri í nokkurn tíma, en hann er að sjálfsögðu einn besti leikari samtímans og á að baki bæði ógleymanlegar og vandaðar leikframmistöður, nægir þar að nefna óskarsverðlaunaframmistöður hans sem ég nefndi fyrr í pistlinum og t. D. Taxi Driver, The Deer Hunter, Mean Streets og Cape Fear. Hann hlaut fyrir þessa frammistöðu verðskuldaða tilnefningu til Golden Globe-verðlaunanna fyrir besta leik ársins í gamanhlutverki. Ben Stiller skilar einnig góðri frammistöðu í hlutverki hins seinheppna tengdasonar sem reynir að þóknast tengdapabba. Blythe Danner (móðir óskarsverðlaunaleikkonunnar Gwyneth Paltrow) er einnig skínandi góð í hlutverki tengdamömmunnar, en Teri Polo er ekkert sérstök í hlutverki Pam (það hefði átt að fá aðra í þetta hlutverk). En semsagt; hér er á ferðinni hin besta skemmtun fyrir alla fjölskylduna, allir ættu að hafa mikið gaman að þessari og ættu að geta hlegið hressilega saman. Í stuttu máli sagt; frábær gamanmynd sem hreinlega allir verða að sjá!

Eftir mjög slæma dóma í blöðum um myndina lét ég hana bíða þar til ekkert annað var eftir og tók hana þá með ólund. Það styrkti slæma tilfinningu að sjá þessa hallærislegu mynd á kápunni. En viti menn, þetta var prýðis mynd, Stiller og De Niro auðvitað báðir brilljant eins og oftast og ég hló bara helling. Maður tekur hana ekki ef mann langar að sjá Taxi Driver, en í samanburði við aðrar 'vitlausar' gamanmyndir, þá þarf þessi ekkert að skammast sín.

Snilldar mynd! Robert De Niro heldur þessu náttúrulega uppi. Ef hann væri ekki í myndinni væri hún örugglega ekki eins góð. Alltaf gaman að Ben Stiller. Maðurinn er einfaldlega ótrúlega góður í því að leika misheppnaða náunga. Brillíant leikarar í brillíant mynd.

Meet the Parents er sérlega vel úthugsuð útfærsla á mjög einfaldri hugmynd: Ungur maður fer heim með kærustunni eina helgi til að hitta foreldrana og biðja pabbann um hönd hennar. Virðist ekki vera mjög skelfileg hugmynd, eða hvað? En þegar í ljós kemur að pabbinn er enginn annar en Robert De Niro byrjar gamanið, og það er minnsta vandamál vesalings Gregs Focker (Ben Stiller). Það er með ólíkindum hvað aðstandendum myndarinnar tekst að mjólka hugmyndina og gera jafnvel heppnaða heildarmynd og raun ber vitni. Þar er einna helst að þakka þeim félögum Stiller og De Niro. Þeir eru hreint út sagt frábærir í sínum hlutverkum, og samspilið á milli þeirra er óborganlegt. Blythe Danner í hlutverki mömmunnar á marga góða spretti, en flestir þeirra eru í bakgrunninum meðan faðir og tengdasonur eru á fullu svo þeir týnast nokkurn veginn. Veiki punkturinn er Teri Polo í hlutverki kærustunnar. Hún var slöpp í öllum þeim myndum sem hún hefur gert (man einhver eftir hörmunginni Mystery Date?) og hún hvarf í 7-8 ár. Af hverju var hún dregin upp úr gröfinni hér? Maður hefði haldið að það væri auðvelt að fá góða unga leikkona fyrir svona mynd, nóg er til af þeim. Sömu brandararnir (kötturinn, starf Gregs) eru svolítið ofnotaðir. Og auðvitað þarf að hamra inn boðskapnum banvæna í lok myndarinnar. Þrátt fyrir nokkra galla er þetta yfir höfuð gott bíó, sérstaklega þegar Stiller og De Niro fara á flug. Framhaldsmyndin verður eflaust jafn hressileg.

Fín gamanmynd um náunga að nafni Greg sem fer með kærustunni sinni í ógleymanlega helgarheimsókn til foreldra hennar. Ben Stiller leikur aðalpersónuna mjög skemmtilega sem viðkunnalega og rólega týpu, samspil hans og Robert De Niro sem leikur stranga tengdaföðurinn er oftast mjög skondið. Það má segja að myndin lýsi martröð sérhvers karlmanns á einstaklega fyndinn hátt, atburðarásin eftir að Greg kynnist tengdaforeldrunum er svo ótrúlega vandræðaleg að það er ekki annað hægt en að hlæja - og er það ekki það sem maður sækist eftir þegar maður fer á gamanmyndir? Þessi mynd er engan veginn fullkomin en sem grínmynd verður hún að teljast góð og vel það.