10 Things I Hate About You (1999)

Ágætis unglingamynd sem fjallar um tvær systur, Biöncu og Kat, sem eiga strangan föður sem leyfir þeim ekki að umgangast stráka. Strákur sem er nýbyrjaður í sama skóla, Cameron, verður við fyrstu sýn ástfanginn af Biöncu en það verður fljótt ljóst að það mun þurfa mikið til svo að hann megi hitta hana. Þegar Bianca kvartar við föður sinn um þessar ströngu reglur setur hann það skilyrði að hún megi umgangast stráka þegar andfélagslega systir hennar Kat byrjar á því. Cameron og félagi deyja ekki ráðalausir og ráða náunga nokkurn að nafni Patrick til þess að fá Kat til að fara út með sér. Að sjálfsögðu gengur áætlun þeirra ekki alveg eins og skyldi og málin flækjast verulega. Í byrjun myndarinnar var mjög áberandi hversu miklar stereótýpur persónurnar voru flestar en þegar líða fór á myndina náðu þær langflestar að brjótast út úr því. Það má þannig segja að hluti boðskaps myndarinnar að fólk er ekki allt þar sem það er séð. Það eru einstaka klisjur í myndinni og ekki hægt að segja að hún sé neitt sérstaklega frumleg, en hún er samt skemmtileg, hugljúf og hefur hjartað á réttum stað.