Kvikmyndaleikstjórinn Baltasar Kormákur er nú að skoða tilboð frá framleiðendum Sherlock Holmes kvikmyndanna, um að gera stóra mynd, sem hugsanlega yrði byrjunin á myndaflokki í svipuðum stíl og Sherlock Holmes myndirnar. Þetta kemur fram í viðtali við leikarann í Fréttablaðinu í gær.
Í blaðinu segir að Baltasar Kormákur geti nú valið úr tilboðum eftir frábært gengi Hollywood-myndarinnar Contraband með Mark Wahlberg í aðalhlutverki og vel heppnaðar sýningar á Djúpinu erlendis. „Ég er búinn að fá nokkur tilboð eftir sýningar á henni [Djúpinu]. Risatilboð frá Warner Brothers og fleirum, þannig að hún mælist rosalega vel fyrir. Ég er búinn að gera Contraband og menn þekkja mig dálítið. Svo sjá þeir þessa mynd og sjá einhvern annan vinkil,“ segir leikstjórinn í samtali við blaðið.
Heldur í vonina
Djúpið er framlag Íslands til Óskarsverðlaunanna á næsta ári og Baltasar er spurður um væntingar sínar til mögulegrar tilnefningar til Óskarsverðlauna: „Ég hef ekki séð hinar myndirnar. Þetta er eins og að hlaupa í kapp við einhvern sem maður veit ekki hvað hleypur hratt. En ég held í vonina. Það verður gaman ef það tekst.“
Leikstjórinn er staddur í Los Angeles að ljúka við svokallað „directors cut“ á spennumyndinni Two Guns með Denzel Washington og Wahlberg í aðalhlutverkum. Um tíu vikna ferli er að ræða þar sem Baltasar púslar myndinni saman og lýkur því núna rétt fyrir jólin. Næsta skref verður að fá viðbrögð fólks við útkomunni. Two Guns er dýrasta myndin sem hann hefur gert í kvikmyndaborginni og kostar um sjö milljarða króna eftir skattaafslátt. Frumsýning er fyrirhuguð 16. ágúst á næsta ári.
The Missionary og Everest næst
Í viðtalinu kemur fram að vinna við Two Guns haldi síðan áfram eftir áramót en að henni lokinni, eða í apríl, ferðist Baltasar til Ungverjalands og Berlínar þar sem hann leikstýrir prufuþætti fyrir nýja sjónvarpsþáttaröð, The Missionary, á vegum sjónvarpsrisans HBO. Benjamin Walker, virtur sviðsleikari í New York, leikur aðalhlutverkið.
„Að því loknu mun Baltasar líklega leikstýra myndinni Everest sem er sannsöguleg og fjallar um óveður sem klifurmenn lentu í í hlíðum Everest, hæsta fjalli jarðar, árið 1996. Stefnan er að taka hana upp að mestum hluta á Íslandi. Einhverjar tökur verða líka á Everest í Nepal.“
Framleiðendur Everest verða Working Title og Universal og stefnir allt í að myndin verði sú dýrasta sem Baltasar hefur tekið sér fyrir hendur. Með skattaafslætti er reiknað með um 7,6 milljarða króna kostnaði, að því er segir í Fréttablaðinu.
