Stórleikarinn Christian Bale hefur lýst því yfir að hann sé búinn að leggja skikkjuna á snagann. Tökum á The Dark Knight Rises lauk fyrir stuttu og nú tekur við eftirvinnsla myndarinnar. Bale lítur svo á að sínu verki sé nú lokið og að hann ásamt leikstjóra myndarinnar, Christopher Nolan, munu ekki gera fleiri Batman myndir að svo stöddu.
,,Það er allt búið. Tökum er lokið, þannig að þetta var í síðasta sinn sem ég fer í Batman búninginn.“ sagði Bale í viðtali, en hann og Nolan unnu saman að Batman Begins árið 2005 og nú síðast The Dark Knight árið 2008.
Þetta er í fyrsta sinn sem Bale tjáir sig um framhald Batman myndanna, en hann sagði í viðtali í nóvember í fyrra að ef Nolan vildi halda áfram með Batman myndirnar þá myndi hann glaður vera með. Því er ljóst að The Dark Knight Rises verður síðasta Batman myndin í bili, en myndin verður ein af stærri sumarmyndum næsta árs.
