Tökur á kvikmyndinni Laxdæla Lárusar hófust í morgun í Búðardal með Stefáni Karli Stefánssyni, Eggerti Þorleifssyni og Ágústu Evu Erlendsdóttur í aðalhlutverkum. Leikstjóri myndarinnar er Ólafur Jóhannesson. Tökur munu standa yfir 7 vikur í Búðardal og Reykjavík.
Í fréttatilkynningu frá Poppoli kvikmyndafélaginu sem framleiðir myndina segir að Laxdæla Lárusar segi frá verkfræðingi í Reykjavík sem er nýfráskilinn. Hann lýgur sig inn í aðstæður til að geta bjargað sveitarfélagi á Vesturlandi frá glötun í örvæntingafullri tilraun til að finna sjálfan sig.
„Leikarahópur myndarinnar samanstendur af mörgum af þekktustu leikurum þjóðarinnar og þeim bregður fyrir í stórum sem smáum hlutverkum. Helstu leikarar Laxdælu Lárusar eru: Stefán Karl Stefánsson, Ágúst Eva Erlendsdóttir, Hilmir Snær Guðnason,
Harpa Arnardóttir, Eggert Þorleifsson, Ragnhildur Steinunn, Benedikt Erlingsson, Halldóra Geirharðsdóttir,Ingvar Eggert Sigurðsson, Jóhann G. Jóhannsson, Guðmundur Ólafsson, Nanna Kristín Magnúsdóttir, Gunnar Hansson, Flosi Ólafsson og Magnús Ólafsson,“ segir í tilkynningu Poppoli.
Ólafur Jóhannesson leikstýrði áður Stóra planinu, Queen Raquela og vefþáttunum Circledrawers. Handritið er skrifað af Ólafi og Hrafnkeli Stefánssyni.
Laxdæla Lárusar Skjaldarsonar er framleidd af Kristínu Andreu Þórðardóttur, Jóhanni G. Jóhannssyni og Ólafi Jóhannessyni, sem sést á meðfylgjandi mynd með fréttinni.
