Sveitabrúðkaup, kvikmynd Valdísar Óskarsdóttur hefur verið valin til sýningar á kvikmyndahátíð bresku kvikmyndastofnunarinnar (BFI) í Lundúnum þar sem hún keppir um hin eftirsóttu Sutherland-verðlaun. Hátíðin hefst 15. október og líkur 30. október. Verðlaunin falla í skaut þess kvikmyndagerðamanns sem sýnir mikinn frumleika og hugsjónasýni í sinni fyrstu kvikmynd í fullri lengd. Í fyrra hlaut teiknimyndin Persepolis verðlaunin.
Sveitabrúðkaup var nýlega frumsýnd á kvikmyndahátíðinni í Toronto þar sem hún vakti mikla athygli meðal áhorfenda og hefur sýningarréttur verið seldur til Frakklands, Ástralíu, Kanada, Ísrael, Sviss og Mexíkó. Meðal annars mun myndin vera frumsýnd í Ástralíu á u.þ.b. 40 sýningarsölum.
Sveitabrúðkaup segir frá Ingibjörgu og Barða sem hafa ákveðið að giftast eftir þriggja ára sambúð. Þau ákveða að gifta sig í lítilli sveitakirkju klukkutíma keyrslu frá Reykjavík. Ingibjörg, Barði og brúðkaupsgestirnir – nánustu ættingjar og vinir halda af stað í tveimur litlum rútum öll spariklædd og tilvonandi brúðhjón í brúðargallanum. Brúðargjafir, kampavín og kransakaka í skottinu. En þetta fer ekki alveg eins og þau hefðu viljað óska sér.
Í helstu hlutverkum í kvikmyndinni eru Björn Hlynur Haraldsson, Nanna Kristín Magnúsdóttir, Nína Dögg Filippusdóttir, Gísli Örn Garðarsson,Ólafur Darri Ólafsson, Víkingur Kristjánsson, Ingvar E. Sigurðsson, Sigurður Sigurjónsson og Þröstur Leo Gunnarsson.
Sveitabrúðkaup er meðal fimm mynda sem koma til greina sem framlag Íslands til Óskarsverðlaunanna og standa kostningar nú yfir hjá Íslensku kvikmynda- og sjónvarpsakademíunni.
Nánar um Sveitabrúðkaup á sveitabrudkaup.is og á undirsíðu myndarinnar hér á Kvikmyndir.is