Kvikmynd Valdísar Óskarsdóttur, Sveitabrúðkaup var frumsýnd í gærkvöldi
á kvikmyndahátíðinni í Toronto fyrir fullu húsi gesta þar sem var
klappað og stappað til skiptis að henni lokinni. Valdís, ásamt ellefu
manna föruneyti leikara og framleiðenda fylgdu myndinni út og vöktu
mikla athygli meðal áhorfenda þegar þau mættu á sýninguna í íslenskum
lopapeysum.
,,Frumsýningin gekk glæsilega fyrir sig og var
klappað og stappað í gríð og erg. Áhorfendur ráku upp stór augu þegar
við mættum í íslenskum lopapeysum, eða eins og hópur galvaskra víkinga“
sagði Hreinn Beck, framleiðandi myndarinnar.
Að sýningu lokinni
svaraði Valdís spurningum úr salnum við góðar undirteknir áhorfenda og
var m.a. spurt út í framleiðslu myndarinnar, en myndin var tekin upp á
7 dögum. Einnig var spurt um tónlist myndarinnar sem er í höndum
hljómsveitarinnar The Tiger Lillies.
Sveitabrúðkaup segir frá Ingibjörgu og Barða sem hafa ákveðið að giftast eftir þriggja
ára sambúð. Þau ákveða að gifta sig í lítilli sveitakirkju klukkutíma
keyrslu frá Reykjavík. Ingibjörg, Barði og brúðkaupsgestirnir – nánustu
ættingjar og vinir halda af stað í tveimur litlum rútum öll spariklædd
og tilvonandi brúðhjón í brúðargallanum. Brúðargjafir, kampavín og
kransakaka í skottinu. En þetta fer ekki alveg eins og þau hefðu viljað
óska sér.
Í helstu hlutverkum eru Björn Hlynur Haraldsson, Gísli Örn Garðarsson, Ingvar E. Sigurðsson, Nanna Kristín Magnúsdóttir, Nína Dögg Filippusdóttir, Ólafur Darri Ólafsson, Rúnar Freyr Gíslason, Sigurður Sigurjónsson, Víkingur Kristjánsson og Þröstur Leo Gunnarsson.
Sveitabrúðkaup er til sýninga í Sambíóunum Álfabakka, Keflavík, Akureyri, Selfossi og Háskólabíói.
Nánar um Sveitabrúðkaup á sveitabrudkaup.is