Samkvæmt síðunni Deadline hefur leikstjórinn Zack Snyder og Warner Bros. fundið leikarann sem mun fara með hlutverk Superman í nýrri mynd um Ofurmennið. Henry Cavill heitir kappi sá og hefur farið með hlutverk í myndum á borð við Stardust og Tristan + Isolde.
Þetta er ekki í fyrsta skipti sem Cavill er orðaður við Superman því hann var talinn líklegur til að hreppa hlutverkið í Superman Returns, sem Brandon Routh fékk að lokum. Í þetta sinn vildi Snyder og framleiðandi myndarinnar, Christopher Nolan, sýna ofurhetjuna víðfrægu rúmlega 30 ára að aldri, en Cavill er 28 ára gamall.
Sjálfur hafði Zack Snyder þetta að segja; „Það er mér mikill heiður að fá að taka þátt í þessu verkefni og ég er gríðarlega spenntur yfir þessari ráðningu. Henry er fullkominn í þetta hlutverk og hann verður glæsilegur með skikkjuna og S-ið á bringunni.“
– Bjarki Dagur
