The Adventures of Ford Fairlane (1990)

Ford Fairlane var ein af mínum uppáhaldsmyndum þegar hún kom út fyrir rúmlega 10 árum svo ég ákvað um daginn að endurnýja kynni mín af þessari snilld og náði mér í hana á spólu. Myndin fjallar um ofurtöffarann Ford Fairlane (leikinn af Andrew Dice Clay) en hann er eins konar einkaspæjari sem sérhæfir sig í skuggalegri hliðum tónlistariðnaðarins, það er að segja þegar hann er ekki að sofa hjá nærfatnafyrirsætum. Þar sem við kemur sögu er Ford í peningakröggum og tekur því að sér mál sem er hálfgerð skítalykt er af, þetta hrindir af stað spennandi og sprenghlægilegri atburðarás. Á yfirborðinu er aðalpersóna myndarinnar frekar ógeðfelld þar sem Ford er grófur, mikið karlrembusvín og hugsar bara um sjálfan sig en einhvern veginn tekst Clay að fá mann til þess að líka vel við persónuna. Það hjálpar líka að myndin tekur sig alls ekki alvarlega en virkar þó á einhverju plani sem spennumynd auk þess að vera grínmynd. Handritið er vel skrifað og með leikstjórn Renny Harlins verður útkoman að algerum gullmola, að minnsta kosti fyrir þá sem kunna að meta dálítið grófan húmor.