Man on Wire (2008)

Man on Wire er ein skemmtilegasta heimidarmynd sem ég hef séð. Myndin segir frá Frakkanum Philippe Petit sem er einskonar ofurhugi. Hann er með ákveðna áráttu sem tengist því að ganga á línu milli hárra turna. Þegar hann sá teikningar af tvíburaturnunum, áður en þeir voru byggðir, ákvað hann að hann yrði að ganga á milli þeirra. Maðurinn er auðvitað snar-geggjaður en þetta er sönn saga. Petit, ásamt félögum sínum, var í mörg ár að skipuleggja verknaðinn og var í 8 mánuði í New York árið 1974 áður en hann lét verða af þessu. Þeir fóru ótal ferðir í turninn og hvert smáatriði var úthugsað. Þar sem þetta er ólöglegt var nokkuð flókið að komast framhjá vörðum og setja upp búnaðinn. Þessi atburður varð síðar þekktur sem “the artistic crime of the century”.

Plakatið á myndinni segir manni nokkurn veginn hvað gerist svo að skemmtunin felst fyrst of fremst í frásögninni. Petit er mjög skemmtilegur sögumaður og þessi saga hans er gjörsamlega ógleymanleg. Þessi mynd á góða möguleika á að vinna óskarsverðlaun fyrir bestu heimildarmynd, ég myndi allavega styðja það. Frábær mynd.

“If I die, what a beautiful death!”