Pirates of the Plain (1999)

Ungur drengur sem á það til að láta sig dreyma dagdrauma kemst að því að raunveruleikinn hefur náð í skottið á ímyndunaraflinu – og það með látum – í þessari gaman-ævintýramynd fyrir alla fjölskylduna. Bobby (Seth Adkins) er átta ára drengur sem elst upp í afskekktu samfélagi í Miðvesturríkjum Bandaríkjanna ásamt móður sinni (Dee Wallace Stone) og afa (Charles Napier), sem berjast við að halda fjölskyldubúinu á floti. Þar sem vinirnir eru fáir og lítið annað að gera en að sinna heimilisstörfunum skemmtir Bobby sér með því að hörfa inn í heim fantasíunnar þar sem hann berst við kúreka og geimfara og er alltaf skrefi á undan vondu köllunum. Dag einn lítur út fyrir að óveður sé í aðsigi yfir bænum þegar dökkrauð ský fylla himininn, en það kemur í ljós að tímahlið hefur opnast í andrúmsloftinu. Og hver annar en Jezebel Jack (Tim Curry) dettur í gegn, montinn sjóræningi (eða „sjálfstætt starfandi ævintýramaður“, eins og Jack kýs að orða það) frá sautjándu öld. Bobby bjargar Jack og býður honum gistingu heima hjá sér og drengurinn er alsæll með að hafa eignast nýjan og áhugaverðan vin. En þar sem sjóræningjar eru á ferð fylgir vandræðagangurinn ávallt með og það líður ekki á löngu þar til skip keppinauta hans eltir Jack í gegnum tímahliðið. Bobby verður að taka höndum saman með Jack til að verja heimili sitt fyrir sjóræningjaskipi sem siglir um hveitiakrana.