The Ring Two (2005)

The Ring 2 er það nýjasta í þeirri tísku að endurgera japanskar hrollvekjur. Þar sem hún er framhaldsmynd gæti þetta tilfelli sloppið en mér finnst Hollywood-iðnaðurinn vera orðinn ofsalega slappur þegar það kemur að hryllingsmyndum nú til dags. Maður er alveg hættur að sjá metnaðinn á skjánum. Oftast eru þetta bara brellur og ódýrar bregður. Vissulega gengur þetta mikið út á það að svona myndir skila oftast inn slatta af seðlum, en einhvers staðar hlýtur að finnast leikstjóri sem hefur það í sér að leggja vinnu í það sem hann gerir við svona efni. Fyrri endurgerðin á The Ring kom mjög vel út að mínu mati. Hún var einhvern veginn öðruvísi en aðrar kanahrollvekjur, aðallega því hún hafði gott andrúmsloft og bregðuatriði sem almennilega virkuðu, frekar en að blekkja mann. Þessir kostir gerðu það að verkum að ég var sæmilega spenntur fyrir framhaldinu. Svo í ljós kom að myndin er álíka auðgleymd, ómerkileg, óspennandi og formúlubundin og flestar aðrar af þessari sort. Leikstjórinn Hideo Nakata (sem gerði einmitt fyrstu tvær japönsku frummyndirnar og stóð sig ágætlega með þær) á einfaldlega ekki heima á bandaríska markaðinum. Útlitið og andrúmsloftið sem Gore Verbinski skapaði áður er gjörsamlega horfið hér, og í kjölfarið finnst manni alveg vanta stíl í myndina. Tölvubrellur eru líka ofnotaðar og leikstjóranum finnst mjög gaman að ''hrekkja'' áhorfendur með óþörfum áherslum í stemningunni sem að lokum borga sig ekki neitt (einhvers konar uppbygging að bregðusenu, ef svo má orða það). Leikararnir eru alveg hættir að gera eitthvað fyrir mann. Naomi Watts endurtekur sömu rútínuna út í gegn og krakkinn sem leikur son hennar er ekki lengur creepy, heldur bara einhæfur. Síðan kem ég auðvitað að aðalmálinu með að fullyrða það að myndin er ekki vitund óhugnanleg eða hryllileg (nema jú, í annarri merkingu). Ég var alveg gáttaður yfir öskrunum sem voru þarna í salnum. Það mætti halda að þetta fólk hafi enga reynslu á hrollvekjum (hvað er t.d. svona rosalegt við örfá brjáluð dádýr?? Ég bara spyr...). Öll þau atriði sem áttu að vekja óhug eru 100% by-the-book (afsakið slettuna), og stundum frekar yfirdrifin. En Ring 2 stóðst ekki mínar væntingar á endanum. Maður mátti svosem alveg búast við þessu, en það er bara leitt hvernig þeir náðu að klúðra einhverju sem hefði getað orðið flottur viðauki í hryllingsmyndageirann.3/10

Hvernig er þetta eiginlega með þessar hrollvekjur nú til dags? Þær eru fæstar nógu góðar eða nógu hrollvekjandi þó að ég geti samt nefnt einhverjar sem hafa vissan gæðastimpil og hafa ekki liðið mér úr minnum. En The Ring two er sorp. Hún er mjög einhæf og einblínir alltof mikið á þessa Rachel sem Naomi Watts leikur. Leikstjórinn Hideo Nakata virðist skippa alveg alvöru hrolli(hans vegna vona ég að það sé ekki viljandi)og býður okkur frekar upp á einhverja formúlukennda þvælu. Eiginlega á þessi mynd ekki skilið meira heldur en hálfa stjörnu fyrir skammarlega mikinn skort á skemmtanagildi en ég verð að gefa henni eina heila stjörnu því að myndin byggir upp vissa spennu og maður vill sjá hvernig hún endar. Endirinn efnir samt ekki þau loforð sem byrjunin gefur og maður hreinlega gengur alltof ósáttur út úr salnum. Ég veit að ég gerði það. Slæm mynd. Mjög svo.

Framhaldsmyndabrjálæðið heldur áfram og það er eins og Hollywood þurfi nú að gera frh. af hverri einustu mynd sem kemur út (reyndar er auðvitað búið að gera þrjár japanskar Ring myndir svo maður gat alveg búist við þessu).

Það má eiginlega segja að það hafi verið bandaríska útgáfan af Ringu sem byrjaði þetta hryllingsmyndaæði sem nú stendur yfir og af því að hún var svo góð þá fór maður á þessa mynd með smá væntingar. Í stuttu máli sagt þá stóðst hún þær ekki. Jú, það komu nokkur ágætis bregðu/hræðslu atriði inn á milli en það vantaði oft mikið uppá söguþráð myndarinnar og hún er alls ekki jafn heilsteypt og nr. 1. David Dorfman stóð sig ágætlega sem Aidan og þessi mynd er svo sem ekki leiðinleg en sennilega bara þeir sem hafa gaman af hryllingsmyndum fíla þessa mynd yfir meðallagi. Þeir sem ekki sjá þessa mynd eru ekki að missa af miklu.

Nú er bara að sjá hvort Ring 0 rífur bandarísku seríuna upp aftur eða dregur hana algerlega niður í svaðið.

Þegar ég fór á þessa mynd þá bjóst ég ekki við miklu. Fyrri myndin var mjög góð og hélt ég að þessi yrði einhverskonar misheppnað framhald sem myndi fjalla um nákvæmlega það sama og sú fyrri eins og svo oft hefur verið raunin með myndir nr 2. En það virtist ekki vera raunin að þessu synni, þessi mynd sló fyrri myndina alveg út og var allt öðruvísi en hin og miklu betri í alla kanta. Þessi mynd er meira hrollvekjandi, drungalegri, meira spennandi og bara allt öðruvísi söguþráður. Myndin skýrir eitthvað af þeim ósvöruðu spurningum úr fyrri myndinni. Mæli samt með að fólk sjái The Ring 1 áður en það sér þessa svo það viti almennilega um hvað málin snúast.

Frábær mynd í alla kanta, mæli með henni ef þig langar að sjá hrollvekjandi og spennandi mynd.

Ég verð að segja það að ég fór á þessa mynd með pínu eftirvæntingar, útaf því að mér fannst fyrsta myndin svo ótrúlega góð. Mér fannst söguþráðurinn stundum alveg glataður í myndinni og það komu oft asnalega leiðinleg atriði inní sem gerði myndina leiðinlega. En svo komu þessi atriði sem voru jú helvíti góð og flott, og má ég nefna að Michael Jackson leikur aukahlutverk í myndinni....hann leikur konunna á geðveikrar hælinu. Það fékk mig til að hlægja!! Ég veit samt ekki hvað ég þarf að segja mér það oft að fara ekki á myndir sem er númer 2 því þær eru yfirleitt lélegri heldur en fyrsta myndin. Ég gef henni tvær stjörnur sem er full mikið meira segja að mínu mati....

Ring 2 heldur áfram með sögu Rachels og son hennar sem eru á ferð um Bandaríkin og finna nýtt heimili eftir hræðilegu atburðina sem gerðust í Seattle. Ring 1 er líklega mest spennandi mynd sem ég hef nokkurn tíman séð, ég fór að grenja eins og lítið barn þegar ég lokasenuna í Ring. Það sem Ring 2 vantar gersamlega er þessi glæsilega uppbygging sem Ring 1 hefur, Ring 2 skortir allan kraft, allt það sem gerði fyrri myndina góða. Mikið er af tölvubrellum í myndinni, í fyrri myndinni voru þær notaðar í hófi en hérna er of mikið af þeim og ég var mjög ósáttur með þær því tölvubrellur gera lítið gagn í hryllingsmyndum. David Dorfman sem leikur sonin Aiden er nánast eina minnuga við þessa mynd þar sem þessi ungi strákur lék betur en Naomi Watts. Það kom mér gersamlega á óvart, hann far langt fram úr henni þetta skiptið. Ég gef Ring 2 tvær og hálfa því hún var ekki leiðinleg og það voru einhver atriði sem komu mann í gang en því miður var ekki eitt þeirra sem sigrar lélegasta atriði Ring 1. Mér finnst að þetta er framhaldsmynd sem hefði ekki átt að gera eða allavega ekki svona, svo er ekki viturlegt að fá japanska leikstjóra til þess að gera bandarískar kvikmyndir og hvað þá að endurgera sýnar eigin myndir. The Grudge virkaði alls ekki og þessi er alveg á mörkunum.