The Usual Suspects (1995)

Þegar maður heyrir að nýjar spennumyndir koma út er maður ekki mikið spenntur. Ég hef séð aragrúa af spennumyndum og hef eiginlega séð allt sem getur gerst og þegar ég sest niður og horfi á spennumynd get ég vanalega getið mér til um hvað gerist næst. Þess vegna er mikilvægt að koma með svona sniðugar myndir eins og The Usual Suspects. Mjög vel staðið að henni í alla staði. Handritið gott og leikararnir ágætir, Benicio Del Toro kemur sterkur inn. Mjög sniðugur endir og algjörlega þess virði að eyða tveimur klukkutímum í.

Hinir “venjulega grunuðu” menn eru fimm: Dean Keaton (Gabriel Byrne), fyrrverandi spillt lögga sem er þekktur fyrir stálharða framkomu og taugar úr járni; Todd Hockney (Kevin Pollak), sérfræðing í vélbúnaði og sjálfsbjörgun; Michael McManus (Stephen Baldwin), hálf geðveik skytta; Fred Fenster (Benicio Del Toro), félagi McManus sem talar mikið en engin skilur hann og svo Verbal Kint (Kevin Spacey), bæklaður svikahrappur.


Verbal Kint er einn af tveimur mönnum sem lifðu af þegar bátur var sprengdur upp við San Pedro höfn, hinn maðurinn er mjög brenndur og hræddur ungverskur hryðuverkamaður sem segir að Keyser Soze hafi framið verknaðinn. Verbal er tekin af rannsóknarlögreglumanninum Dave Kajun (Chazz Palminteri) og er látinn segja frá öllu sem kemur bátnum við. Kvikmyndin gengur svo út á það að hann er að segja Kajun frá hvað gerðist einsog hann man það. En Kint er ekki áreiðanlegur sögumaður og þegar maður er að horfa á myndina hugsar maður oft, hvað af því sem hann er að segja gerðist og hvað er bara hugarburður hans.


Leikstjórinn, Bryan Singer fær lánað frá mörgum meisturum þegar hann gerði The Usual Suspect, allt frá Hitchcock til Coen bræðra en gerir það vel. Hann nær að taka öll atriðin og gera þau fersk, þó að flest í myndinni hefur komið fram oft áður. Handritið eftir Christopher McQuarrie er magnað það heldur áhorfandanum föngum út myndina og refsar þeim sem fylgjast ekki nógu vel með því að það verður að horfa á myndina frá byrjun til enda til þess að skilja hvað er í gangi að hverju sinni.


Leikararnir eru flestir frábærir, margir leika hlutverk sem er algerlega ólík þeirra venjulegu hlutverkum. Kevin Pollak er vanur að leika “comic relief” góða karlinn en hér er hann vægðarlaus morðingi. Stephen Baldwin leikur hinn fullkomna vitfirring og lætur mann hugsa, hvernig endaði hann með að leika í The Flintstones 2? Benicio Del Toro kemur með flestan húmorinn, aðallega útaf hinum óskiljanlega hreimi. Kevin Spacey fer með besta leik kvikmyndarinnar, hann er algerlega sannfærandi sem hin bæklaða skræfa sem segir söguna en þegar maður hlustar á verður maður að muna að við heirum bara hans útgáfu...

- www.sbs.is

Þessi mynd er númer 1 á top listanum sem er um fimm menn Dean Keaton (Gabriel Byrne), Verbal Kint (Kevin Spacey), Hockney (Kevin Pollack), MacMannus (Stephen Baldwin) og Fenster (Benicio Del Toro) sem allir eru settir í line up hjá löggunni fyrir vopnarán. Eftir það verða þeir að vinna saman á verkefnum og á endanum hjá hinum djöflalegasta krimmann í undirheimunum hann Keiser Soze. Þetta er top mynd með frábærum leikurum og langbesta handrit sem til er. Kevin Spacey vann óskar fyrir besta leik í aukahlutverki og handritið van fyrir besta upprunalega handritið.

Gjörsamlega ómissandi mynd sem að ekki er hægt að hætta að horfa á um leið og þú ert búin/nn að láta myndina í tækið. Benicio Del Toro, Stephen Baldwin, Kevin Spacey, Chazz Palminteri og Gabriel Byrne eru alveg frábærir í þessari snilldarmynd frá leikstjóranum Bryan Singer(hann gerði hina ágætu X-men).

Þessi margslungna spennu- og sakamálamynd hefur farið sigurför um heiminn og þeir eru margir sem telja hana eina af bestu kvikmyndum áratugsins. Kevin Spacey fékk Óskarsverðlaunin fyrir besta leik í aukahlutverki í þessari mynd og auk þess var frábært handritið tilnefnt til verðlaunanna sem besta frumsamda handrit ársins 1995. Hér segir af fimm glæpamönnum sem látnir eru lausir af lögreglunni, allir grunaðir um aðild að miklum skartgripaþjófnaði. Einhvern fer að gruna að ástæðan fyrir því að nákvæmlega þeir skyldu kallaðir til yfirheyrslu vegna málsins sé ekki bara tilviljun. Einhver sé að koma þeim saman í öðrum tilgangi. En hvaða? Og hver? Þeir ákveða að starfa saman að skartgriparáni í Texas. Ránið mistekst og menn liggja í valnum. Í ljós kemur að fimmmenningarnir fengu rangar upplýsingar. Hvaðan komu þessar upplýsingar. Er einhver að svíkja þá og leiða þá í gildru? Hver? Og í hvaða tilgangi? Mafíuforingi einn sem þeir hafa allir átt samskipti við áður, hver fyrir sig þó, lætur á sér skilja að hann hafi öll ráð þeirra í höndum sér og að eina leið þeirra út úr klípunni sé að vinna stóráhættusamt verk þar sem hlutur þeirra er um 91 milljón dollara. Í ljós kemur að einhver maður að nafni Keyser Söse er lykilmaðurinn í málinu. En hver er þessi Keyser Soze? Er það mafíuforinginn? Lögfræðingurinn hans? Lögreglumaðurinn? Eða kannski einhver fimmmenninganna? Hvað vill hann? Atburðarásin er einkar hröð og svo að segja hver mínúta inniheldur óvænta uppgötvun og afhjúpun. Þetta er mynd sem allir verða að sjá því hver er þessi Keyser Soze? Það verður að koma í ljós! Þrælgóð og vönduð spennumynd sem ég gef fjórar stjörnur og mæli eindregið með að þeir sem ekki hafi séð hana drífi í því hið snarasta. Hún er hreint ómissandi fyrir alla kvikmyndaáhugamenn

Snilld. Allir karektarnir eru magnaðir. Gabriel Byrne, Kevin Spacey, Kevin Pollack, Benicio Del Toro(snillingur),Baldwin bróðirinn og svo gaurinn sem ég man aldrei hvað heitir sem leikur lögfræðinginn Kobayashi... Allt menn sem gera þessa mynd hreina snilld, plottið gengur alveg útí gegn og maður hreinlega veit aldrei hvað gerist næst. Mögnuð spennumynd sem það verður hreinlega að sjá, annað væri syndsamlegt.

Þegar ég sá þessa mynd fyrst þá vissi ég ekki við hverju ég átti að búast ég var búin að heyra að hún væri góð og léleg, en þessi mynd er betri en góð hún er argasta snilld! Leikurinn er geðveikt góður og plottið í myndinni bara eins og endirinn það segir allt um þessa mynd. Fjórar stjörnur!

Fimm bófar telja illa farið með sig af lögreglunni og ákveða að hefna sín. Þar með hefst atburðarrás sem er ein sú alskemmtilegasta sem samin hefur verið. Svik, lygar og morð, dásamlegir karakterar og ein flottasta og ófyrirsjáanlegasta saga kvikmyndasögunnar...held ég. Ég held ég hafi horft á hana allavega tíu sinnum. Takið eftir að John Ottman sér bæði um tónlist og klippingu og gerir hvort tveggja vel.