Spennu- og gamanmyndin Leynilögga verður sýnd í tveimur ólíkum útgáfum, en myndin er væntanleg í kvikmyndahús þann 22. október næstkomandi. Verður þá myndin annars vegar sýnd í „12+“ útgáfu og hins vegar „16+“ útgáfu, en eins og merkin gefa til kynna er önnur meira við hæfi ungmenna en hin. Reiknað er þá með meira ofbeldi í stranglega bönnuðu útgáfunni ásamt fleiru sem þykir meira við hæfi eldri hópa.
Auðunn Blöndal, Egill Einarsson, Steinunn Ólína Þorsteinsdóttir, Björn Hlynur Haraldsson, Vivian Ólafsdóttir og Sverrir Þór Sverrisson fara með helstu hlutverk í kvikmyndinni. Í henni má einnig sjá glitta í heitustu söngvara landsins, Bríeti og Jón Jónsson. Þá kemur knattspyrnugoðið og samfélagsmiðlastjarnan Rúrik Gíslason við sögu.
Myndin er byggð á samnefndri grínstiklu frá árinu 2011. Þar fóru ýmsir þjóðþekktir einstaklingar með gestahlutverk og má fastlega gera ráð fyrir að umrædd kvikmynd haldi sama stíl.
Það er Hannes Þór Halldórsson, landsliðsmarkvörður og auglýsingaleikstjóri, sem er við stjórnvölinn og skrifar handritið ásamt Nínu Petersen og Sverri Þór Sverrissyni. Á bakvið söguna standa Auðunn Blöndal, Egill Einarsson og Hannes Þór. Lilja Ósk Snorradóttir hjá Pegasus framleiðir myndina og er Elli Cassata kvikmyndatökumaður.