Hinn geðþekki leikari Michael Keaton hefur ekki verið mjög áberandi upp á síðkastið, en Keaton var einn vinsælasti leikarinn í Hollywood á sínum tíma og lék meðal annars sjálfan Batman og hinn léttklikkaða Beetlejuice, svo aðeins tvær af þekktum persónum Keatons séu nefndar.
Keaton virðist vera að koma til baka af krafti inn í kvikmyndirnar og mun birtast í nokkrum nýjum myndum nú á næstu árum, þar á meðal tveimur stórmyndum, RoboCop og Need for Speed, auk þess sem hann leikur aðalhlutverkið í nýrri mynd Alejandro Gonzales Inarritu, hinni kolsvörtu gamanmynd Birdman.
En áður en sú mynd og hinar tvær koma í bíó, fáum við að sjá hann í spennumyndinni Penthouse North, en ný stikla er komin fyrir þá mynd sem má horfa á hér að neðan:
Myndin var tekin fyrir 16 mánuðum síðan og leikstýrt af leikstjóra Sleeping With the Enemy, Joseph Ruben eftir handriti David Loughery.
Í aðalhlutverkinu er Michelle Monaghan sem leikur blindan fréttaljósmyndara sem neyðist til að taka þátt í lífshættulegum kattar- og músarleik við glæpamann með kvalalosta, sem leikinn er af okkar manni, Keaton. Glæpamaðurinn ætlar sér að komast yfir fjársjóð af stolnum demöntum sem eru faldir í þakíbúð ljósmyndarans.
Talið er að myndin verði frumsýnd á þessu ári.
