Vísindatryllirinn Life, eða Líf, bætir við sig hverri stórstjörnunni á fætur annarri. Nýjasta viðbótin í leikarahópinn er enginn annar en Everest leikarinn Jake Gyllenhaal, en fyrir í myndinni eru þau Deadpool stjarnan Ryan Reynolds og Rebecca Ferguson.
Ástæða þess að Gyllenhaal er kominn til liðs við myndina er sú að tökur hennar rekast á við tökur á annarri mynd Reynolds, Hitman´s Bodyguard, og hann verður því að láta aðalhlutverkið af hendi. Í stað þess að yfirgefa myndina alfarið, þá mun hann leika aukahlutverk, en Gyllenhaal leikur aðalhlutverkið.
Myndin fjallar um geimfara í alþjóðlegu geimstöðinni sem fá sýni frá Mars, og uppgötva merki um líf á plánetunni rauðu. Þau byrja síðan að óttast um sitt eigið líf og framtíð jarðarinnar þegar þau komast að því að þetta lífform er þróaðara en nokkur gat getið sér til um.
Daniel Espinosa leikstýrir.
Næsta mynd Gyllenhaal heitir Demolition, og kemur í bíó 29. apríl nk. í Bandaríkjunum.
