Á föstudaginn næsta, þann 13. desember, frumsýna Sambíóin Disney teiknimyndina Frosinn, eða Frozen, sem er að hluta til byggð á hinu víðfræga ævintýri Hans Christians Andersen, Snædrottningunni, og er eitthvert metnaðarfyllsta verkefni Disney til þessa.
Það er Óskarsverðlaunahafinn John Lassetter sem stýrir framleiðslu myndarinnar, en hann er maðurinn á bak við margar af bestu og vinsælustu teiknimyndum kvikmyndasögunnar eins og t.d. Toy Storymyndirnar. „Gríðarleg vinna og metnaður hefur verið lagður í gerð Frosinn og bendir allt til að myndin eigi eftir að njóta mikilla vinsælda,“ segir í tilkynningu frá Sambíóunum.
Sjáðu stiklu fyrir myndina hér fyrir neðan:
Frosinn er eins og áður sagði að hluta til byggð á ævintýri Hans Christians Andersen, Snædrottningunni, en það er að margra mati ein allrabesta saga hans og um leið ein sú viðamesta. Hún fjallar að grunni til um baráttuna á milli góðs og ills en aðalpersónurnar eru ungur maður og ung kona, Anna og Kristján, sem leggja upp í mikið ævintýri til að finna systur Önnu, snædrottninguna Elsu, sem er bundin þeim álögum að allt sem hún snertir verður að snjó og ís.
Þeim til aðstoðar eru ýmsar skemmtilegar persónur, þ. á m. gáfum gætt hreindýr og orðheppni snjókarlinn Ólafur sem er mörgum og óvæntum hæfileikum gæddur og á sannarlega eftir að reynast þeim Önnu og Kristjáni nytsamur haukur í horni …
Aðalhlutverk:
Íslenskar leikraddir:
Þórdís Björk Þorfinnsdóttir, Sigurður Þór Óskarsson, Ágústa Eva Erlendsdóttir, Þórhallur Sigurðsson, Bergur Ingólfsson og fleiri
Ensku leikraddirnar: Kirsten Bell, Idina Menzel, Jonathan Groff, Josh Gad, Santino Fontana og Alan Tudyk.
Leikstjórn:
Á íslenska talinu: Björn Thorarensen
Á enska talinu: Chris Buck og Jennifer Lee
Bíó: Sambíóin Álfabakka, Egilshöll, Kringlunni, Keflavík og Akureyri, Smárabíó, Laugarásbíó, Selfossbíó, Króksbíó, Ísafjarðarbíó og Bíóhöllin Akranesi
Aldurstakmark: Öllum leyfð
Fróðleiksmolar til gamans:
• Sviðsmyndin í Frosinn er byggð á landslagi Noregs, en þangað voru teiknarar myndarinnar sendir um hávetur til að átta sig sem best á því hvernig umhverfið væri ef allt væri fennt í kaf og frosið.
• Frosinn verður bæði sýnd með enskri og íslenskri talsetningu og þess má geta að í lok myndarinnar, eftir að kreditlistinn hefur runnið sitt skeið á enda, er eitt lítið atriði eftir!
