![](https://kvikmyndir.is/wp-content/uploads/2024/07/longlegs-740x494-1-1024x512.jpg.pagespeed.ce.OjNv2cxBtu.jpg)
Spennuhrollvekjan Longlegs var frumsýnd nú á dögunum og velti Gru og skósveinum hans úr toppsæti íslenska bíóaðsóknarlistans. Alls hafa rúmlega fjögur þúsund Íslendingar séð Longlegs þegar þetta er ritað, en Despicable Me 4 heldur áfram góðu róli með tæplega 30 þúsund gesti.
Longlegs hefur náð gríðarlegum vinsældum um heim allan og er óhætt að telja þetta vera óvæntasta stórsmell sumarsins. Í myndinni segir frá alríkislögreglumanninum Lee Harker sem er efnilegur nýliði í löggunni, en með dularfulla fortíð. Hún fær það verkefni að leita uppi alræmdan fjöldamorðingja. En til þess að binda enda á morðæðið þarf lögreglukonan að leysa ýmsar torræðar þrautir.
Myndinni hefur verið líkt við nútímaútgáfu af Silence of the Lambs og hafa viðtökur gagnrýnenda almennt verið þrusugóðar.
Í þriðja sætinu trónir Snerting eftir Baltasar Kormák og hafa rúmlega 35 þúsund manns séð myndina í kvikmyndahúsum.
Rómantíska gamanmyndin Fly Me to the Moon var einnig frumsýnd um helgina og fór í sjötta sætið, á eftir Twisters og Inside Out 2.
Aðsóknarlistann má finna í heild sinni hér að neðan.
![](https://kvikmyndir.is/wp-content/uploads/2024/07/xScreenshot-2024-07-22-at-13.39.08.png.pagespeed.ic.FmoEiJiieR.png)