Bransadagar RIFF fá í ár óvenju beittan undirtón eins og lesa má um á vef hátíðarinnar. Þar segir að fólk í íslenskum kvikmyndabransa hafi lýst stöðunni í brandsanum sem neyðarástandi og frosti.
Erik Hemmendorff, Susan Wendt og Ruben Östlund.
Á meðal gesta í ár eru Erik Hemmendorff hjá Plattform Produktion, sem hefur framleitt flestar myndir kvikmyndaleikstjórans Ruben Östlund, Susan Wendt, forstjóri TrustNordisk, eins af stærstu sölu- og dreifingarfyrirtækjum á Norðurlöndunum, og Rémi Burah, aðstoðarforstjóri og stjórnarmaður hjá ARTE, einni virtustu og áhrifamestu menningarsjónvarpsstöð Evrópu.
Þessi nöfn tengjast beint fjármögnun kvikmynda, sölu- og dreifingu þeirra og evrópsku samstarfi.
Fyrir íslenskan kvikmyndaiðnað gæti þetta skipt máli. Þegar framleiðendur tala um frost í kerfinu snýst málið ekki bara um færri tökudaga eða lengri bið eftir styrkjum. Það snýst um hvort verkefni komist af hugmyndastigi, hvort þau nái út fyrir landsteinana og hvort íslenskt kvikmyndafólk geti haldið samfellu í vinnu.
Bransadagarnir verða því ekki bara „networking“ með kaffibollum og nafnspjöldum. Þeir gætu orðið vettvangur fyrir harðari umræðu um hvað þarf til að koma íslenskri kvikmyndagerð aftur á hreyfingu.
RIFF hefst 24. september og stendur til 4. október.
Heimild: RIFF Industry Days
