Stórleikarinn Christian Bale hefur ekki leikið í mörgum vestrum í gegnum tíðina, sá síðasti var 3:10 To Yuma, en nú hefur hann sett upp kúrekahattinn fyrir leikstjórann Scott Cooper, sem leikstýrði honum í Out of the Furnace.
Í þessari nýju mynd, sem ber heitið Hostiles, leikur Bale goðsagnakenndan foringja í bandaríska hernum, Blocker, sem hefur reynt eitt og annað í gegnum tíðina, og hatar indjána meira en pestina. Þegar honum er skipað að fylgja deyjandi Cheyenne höfðingja, sem We Studi leikur, og fjölskyldu hans aftur til síns heima í Montana, þá er hann hikandi í fyrstu, en ákveður síðan að taka verkefnið að sér.
Á leðinni hitta þeir ekkjuna Rosalie Quad, sem Rosamund Pike leikur, en fjölskylda hennar var myrt. Þau leiða saman hesta sína og berjast við mótlæti og óvini á leiðinni.
Aðrir helstu leikarar eru Ben Foster, Peter Mullan, Rory Cochrane og Jesse Plemons.
Kvikmyndin verður frumsýnd á alþjóðlegu kvikmyndahátíðinni í Toronto í Kanada sem hefst í dag og stendur til 17. September.
Ekki hefur verið tilkynnt enn um frumsýningardag í almennum sýningum í bíóhúsum.