Tvær eftirminnilegar persónur úr upprunalegu The Mummy hafa verið staðfestar í The Mummy 4, en Kevin J. O’Connor og Oded Fehr snúa báðir aftur í hlutverk sín.
Kevin J. O’Connor og Oded Fehr endurtaka hlutverk sín sem Beni Gabor og Ardeth Bay, en þeir bætast í hóp leikara sem þegar hefur verið staðfestur. Brendan Fraser, Rachel Weisz og John Hannah snúa öll aftur sem Rick O’Connell, Evelyn Carnahan og Jonathan Carnahan.
Sérstaklega vekur endurkoma Beni Gabor athygli, enda lést persónan í lok fyrstu The Mummy frá 1999 þegar hin forna týnda borg Hamunaptra hrundi saman. Ekki hefur verið upplýst hvernig hann verður skrifaður inn í söguna á ný. Hvort hann snúi aftur í endurminningum, verði vakinn til lífsins með Bók hinna dauðu eða á annan hátt.
Ardeth Bay, leiðtogi Medjai-stríðsmannanna, leikinn af Oded Fehr, var ein vinsælasta aukapersóna fyrstu tveggja myndanna og margir aðdáendur hafa lengi viljað sjá hann snúa aftur.
Jafnframt hefur verið greint frá því að Numan Acar, sem hefur meðal annars leikið í Homeland, Spider-Man: Far From Home og Aladdin, hafi gengið til liðs við leikarahópinn. Hlutverk hans hefur þó ekki verið opinberað.
Leikstjórarnir Matt Bettinelli-Olpin og Tyler Gillett, sem standa á bak við Ready or Not, Scream, Scream VI og Abigail, stýra myndinni. Handritið er í höndum David Coggeshall, sem hefur áður skrifað Orphan: First Kill og The Family Plan. Hann hefur hingað til aðallega unnið að smærri Hollywood framleiðslum og því verður fróðlegt að sjá hvernig honum tekst til með eina vinsælustu ævintýramyndaseríu aldamótanna.
Brendan Fraser og Rachel Weisz leika einnig saman á ný í fyrsta sinn í 26 ár, en þau léku síðast saman í The Mummy Returns árið 2001. Weisz tók ekki þátt í þriðju myndinni, The Mummy: Tomb of the Dragon Emperor, sem kom út árið 2008.
Tökur eiga að hefjast síðar í þessum mánuði og stefnt er að því að myndin verði frumsýnd í kvikmyndahúsum í október 2027.
Brendan Fraser hefur sjálfur lýst því yfir að hann hafi beðið í nærri tvo áratugi eftir að fá tækifæri til að snúa aftur sem Rick O’Connell.
„Nú er kominn tími til að gefa aðdáendunum það sem þeir vilja,“ sagði Fraser í viðtali síðastliðið haust.
Það er óhætt að segja að með endurkomu Brendan Fraser, Rachel Weisz, John Hannah, Oded Fehr og Kevin J. O’Connor hafi eftirvæntingin fyrir The Mummy 4 aukist enn frekar meðal aðdáenda The Mummy myndanna.
Heimildir
ScreenRant – Brendan Fraser’s The Mummy 4 Finally Confirms 2 Biggest Missing Character Returns
Men’s Journal – Two Popular Characters Are Returning for ‘The Mummy 4’
IGN – ‘That’s What They Have Stuntmen For!’ — 56-Year-Old Brendan Fraser Shakes Off Age Concerns Ahead of The Mummy 4
The Mummy (1999)
7.1 
7/10 Aðgengilegt á Íslandi
The Mummy Returns (2001)
6.4 6/10 Aðgengilegt á Íslandi
The Mummy: Tomb of the Dragon Emperor (2008)
5.2 6/10 Aðgengilegt á Íslandi
