Hinir árlegu Stuttmyndadagar verða haldnir í Kringlubíói þann 28. maí næstkomandi. Keppt er um bestu stuttmyndina og verða veitt þrenn verðlaun fyrir bestu myndirnar, 100.000 kr. fyrir fyrsta sætið, 75.000 kr. fyrir annað sætið og 50.000 kr. fyrir þriðja sætið. Að auki verða veitt áhorfendaverðlaun, líkt og venja er og Sjónvarpið mun sýna þær myndir sem hljóta áðurnefnd verðlaun. Þá verður leikstjóra þeirrar myndar sem hlýtur fyrsta sætið, boðið á Kvikmyndahátíðina í Cannes að ári þar sem myndin tekur þátt í hinu svokallaða Short Film Corner.
Ásgrímur Sverrisson leikstjóri og handritshöfundur hefur verið ráðinn framkvæmdastjóri hátíðarinnar, sem haldin er af Kvikmyndafélagi Íslands.
Stuttmyndadagar hafa verið haldnir allt frá 1991 og þar hafa fjölmargir kvikmyndagerðarmenn, sem síðar hafa getið sér gott orð, stigið sín fyrstu spor. Má þar m.a. nefna Árna Óla Ásgeirsson, Maríu Sólrúnu Sigurðardóttur, Rúnar Rúnarsson, Ragnar Bragason, Róbert Douglas, Grím Hákonarson, Reyni Lyngdal og Gunnar B. Guðmundsson.
Frestur til að skila inn myndum rennur út þann 11. maí næstkomandi.
Nánari upplýsingar á www.stuttmyndadagar.is