Eftirfarandi er fréttatilkynning frá Poppoli Kvikmyndafélaginu:
Leikstjórn myndarinnar er í höndum Ólafs Jóhannessonar, leikstjóra Stóra Plansins, The Amazing Truth About Queen Raquela og vefþáttanna Circledrawers. Handritið er skrifað af Ólafi og Hrafnkeli Stefánssyni.
„Ég vann með Stefáni fyrir mörgum árum í stuttmynd, sem var góð reynsla,“ segir Ólafur. „Þegar ég ræð leikara þá eru engar sérstakar ástæður fyrir því, það kemur frá einhverju innsæi. Ég hlakka til að vinna með honum og ég held það verði skemmtilegt. Maður veit samt aldrei, hann er að koma frá Hollywood til að leika í þessari litlu mynd og er auðvitað með ýmsar sérþarfir. Hann þarf trailer, vill blátt m&m nammi og sérstök ilmkerti sem þarf að sérpanta frá Asíu.“
Laxdæla Lárusar Skjaldarsonar segir frá verkfræðingi í Reykjavík sem er nýfráskilinn. Hann lýgur sig inn í aðstæður til að geta bjargað sveitarfélagi á Vesturlandi frá glötun í örvæntingarfullri tilraun til að finna sjálfan sig.
Stefán Karl lék nýlega Trölla í leikritinu Dr. Seuss´How the Grinch Stole Christmas í Bandaríkjunum, og hlaut hann mikið lof fyrir frammistöðu sína í því. Áður lék Stefán Karlí kvikmyndinni Stella í Framboði árið 2002.
Laxdæla Lárusar Skjaldarsonar er framleidd af Kristínu Andreu Þórðardóttur, Jóhanni G. Jóhannssyni og Ólafi Jóhannessyni.