Gagnrýni eftir:
Star Wars: Revenge of the Sith0 af 0 fannst gagnrýnin hjálpleg
Loksins.
Það eru ekki margar myndir sem ég hef beðið eftir með jafn mikilli eftirvæntingu og þessi. Held engin. Ég er búinn að vera gjörsamlega háður þessari mynd í meira en tvö ár. Hef lesið um hana á hverjum einasta degi, skoðað myndir úr henni, stolist til að lesa spoilera, og að sjálfsögðu horft á trailerana og hin sýnishornin nú í vetur. Þetta er einfaldlega myndin sem ég hef beðið eftir frá því ég uppgötvaði þessar myndir árið 1997, þegar ég fór á Star Wars: A New Hope í bíó.
Revenge of the Sith fjallar um lokaskref Anakins Skywalker að myrku hliðinni, og verður Darth Vader. Það má segja að þetta fall Anakins sé nokkuð 'smekklega' gert (þó svo að ýmsir hlutir sem hann gerir í myndinni teljist seint smekklegir), og get ég sagt með góðri samvisku að Hayden Christensen standi sig mjög vel í þessu hlutverki, en mér fannst hann óþarflega stífur og mónótónískur í Attack of the Clones. Í þessari er hann gjörbreyttur og mjög sannfærandi karakter. Það sama má segja um rómantísku atriðin milli Anakins og Padmé. Þau atriði í mynd nr. 2 voru harðlega gagnrýnd fyrir illa skrifuð samtöl og stífan leik. Í 'Sith' er þetta mikið betra, og ekkert af þessum atriðum fær mann til þess að líta undan, en nokkuð var um það í fyrri myndinni. Í raun má segja að allt það sem fór í taugarnar á mér við fyrri myndirnar tvær, þ.e. lélegur leikur og illa skrifuð samtöl, hafi stórbatnað í þessari mynd.
Ewan McGregor (Obi-Wan Kenobi), Samuel L. Jackson (Mace Windu) og Jimmy Smits (Bail Organa) standa sig mjög vel í sínum hlutverkum, en sá leikari sem stendur uppúr er Ian McDiarmid, sem Palpatine keisari. Hann er frábær í sínu hlutverki, betri en hann var í Return of the Jedi, og ekki var hann lélegur þar! Annar leikari sem á líka skilið mikið hrós er Frank Oz, ásamt teiknurum ILM, sem glæddu Yoda lífi af mikilli fagmennsku. Hrein unun var að fylgjast með honum alla myndina.
Það eina sem ég hef útá myndina að segja, er nýi 'vondikallinn' General Grievous. Mér fannst hann ekki virka nægilega vel, ekki eins vel og hefði getað orðið. Röddin í honum var tilgerðarleg, og ekki skildist alltaf hvað hann sagði. En að öðru leyti stóð ILM sig mjög vel varðandi þennan karakter, enda algjörlega tölvugerður.
Tónlistin í myndinni er frábær! Þó svo að margir telji John Williams alltaf vera eins og að hann þori ekki að taka áhættur, þá verða þeir hinir sömu að viðurkenna að það sem hann gerir, gerir hann vel. Og það gerir hann í þessari mynd. Hann nær að blanda tónlistinni úr gömlu og nýju myndunum fullkomlega saman, og myndar úr því mjög góða heild. Auk þess eru nýju stefin mjög góð, og fanga anda myndarinnar mjög vel.
Aðrir hlutir, eins og kvikmyndataka, hljóðvinnsla, tæknibrellur, handrit og leikstjórn, sleppa alveg til, og hef ég lítið útá það að setja. Ekkert af þessu var fullkomið, en það var allt vel unnið, enda fagmenn á borð við Ben Burtt, David Tattersall, Rob Coleman og John Knoll að störfum, að ógleymdum George Lucas, sem ætti nú að hafa slegið á allar efasemdir um leikstjórnarhæfileika sína.
Þegar öllu er á botninn hvolft er þessi síðasta kvikmynd Star Wars-seríunnar mikið afrek, og frábær endir á þessari 30 ára ferð sem George Lucas hóf um miðjan 8. áratuginn. Fullt hús!
Catch Me If You Can0 af 0 fannst gagnrýnin hjálpleg
Myndin byrjaði á skemmtilegan hátt, með smá teiknimyndaþætti þar sem tvær aðalpersónurnar eru í smá eltingaleik meðan ýmsar venjulegar upplýsingar um myndina bárust á skjáinn. Þetta virkaði auðvitað vel með frábærri tónlist John Williams á bak við og fannst mér myndin lofa góðu þí ekki væri meira búið af henni. Svo voru áhorfendur allt í einu komnir inn í sjónvarpsþátt þar sem þrír ungir menn sátu fyrir svörum. Allir áttu þeir að vera Frank Abagnale Jr. en aðeins einn þeirra var hann í raun og veru. Myndin rak svo nokkur ár í ævi Frank Abagnale Jr. og hvernig hann náði að svindla peninga á ótrúlegan hátt með því að þykjast vera fyrst flugmaður, svo læknir, svo lögfræðingur o.fl.
Myndin fjallar að mestu leyti um eltingaleik Carl Hanratty (Tom Hanks) og Frank Abagnale Jr. (Leonardo di Caprio). Carl Hanratty er FBI maður sem sérhæfir sig í að finna svikahrappa eins og Frank en það gengur ekkert alltof vel að finna hann. Frank byrjar að svindla eftir að foreldrar hans skilja. Þau skilja vegna þess að mamma hans þolir ekki við lengur með pabba hans eftir að hann varð gjaldþrota og þau neyddust til þess að flytja úr glæsihúsi í litla blokkaríbúð.
Leonardo di Caprio fer ekkert í taugarnar á mér í þessari mynd, en það gerir hann oftast. Hann stendur sig frábærlega ásamt Christopher Walken, í hlutverki Frank Abagnale Sr., og þeir eiga báðir skildar Óskarstilnefningar að mínu mati. Tom Hanks er líka frábær sem Carl Hanratty. Aðrir leikarar standa sig með prýði, s.s. Martin Sheen, Nathalie Baye og Amy Adams.
Tónlistin í myndinni er frábær, besta tónlist John Williams í langan tíma, fyrir utan Star Wars myndirnar tvær. Tónlistin fylgir myndinni vel og stendur hún vel ein og sér. Ég hef mjög gaman af því að hlusta á tónlistina. Hún er Óskarsins verðug. Kvikmyndatakan er mjög góð í höndum Janusz Kaminski sem og klippingin hjá Michael Kahn. Spielberg stendur sig mjög vel í leikstjórastólnum eins og svo oft áður.
Indiana Jones and the Last Crusade0 af 0 fannst gagnrýnin hjálpleg
Ég hef horft á þessa mynd u.þ.b. 150 sinnum og hún er alltaf jafn mikil snilld. Það er bara eitthvað við hana sem heillar alltaf. Samband Jones feðgana er fyndið og er Sean Connery frábær ásamt Ford. Uppáhaldsmyndin mín.