Waking Ned (1998)

Risavinningurinn í írska lottóinu er kominn. Svo undarlega vill til að hann hefur einungis dreifst á einn mann, Ned Devine í hinu örlitla þorpi Tullymore. Þeir Jackie O'Shea (Ian Bannen) og Michael O'Sullivan (David Kelly) hugsa sér gott til glóðarinnar og ákveða að gerast bestu vinir karlsins til þess að fá kannski smáræði af ágóðanum. En þegar þeir banka upp hjá honum er hann látinn. Þeir hugsa sem svo að annar af þeim geti þóst vera Ned og þeir tveir geti þá haldið ágóðanum sem er ekkert smáræði, nánar titekið nærri 7 milljón pund. Waking Ned er ein af þessum virkilega skemmtilegu og hugljúfu gamanmyndum sem koma hvort sem er frá Írlandi eða Bretlandi og Hollywood virðist vera ófært um að gera þrátt fyrir allt sitt stjörnulið. Sagan er mjög einföld en skemmtilega af hendi leyst, sniðug og mjög fyndin. Ian Bannen og David Kelly fara báðir frábærlega með hlutverk sín sem karlfauskarnir og aðrir leikarar eru hvor öðrum betri einnig. Myndin verður alveg drepfyndin oft á tíðum, eins og þegar Jackie dettur í hug að það þurfi kannski aðeins að laga munnsvipinn á Ned til þess að gera þetta raunverulegra eða þegar Michael þarf að þjóta á mótorhjóli allsnakinn heim til Neds til þess að vera á undan manninum frá lottóinu. Í heildina er þetta mjög skemmtileg og mannleg mynd frá írunum.