Titan A.E. (2000)

Titan A.E. Þessari mynd beið ég með eftirvæntingu, en hún olli hún mér ekki vonbrigðum, samt þá hefði hún geta verið betri. Söguþráðurinn var óskup venjulegur Sci-Fi Mynd, í þessu tilfelli, Teiknimynd. Ég er sammála sumu af því sem sagt er að ofan, en sagan sjálf fær 2 stjörnur. Þriðja stjarnan er fyrir brellurnar og raddirnar sem talsettu persónurnar á ensku. Matt Damon, Bill Pullman, Drew Barrymore og fleiri þekktar raddir fá góða dóma. Samt sem áður skemmti ég mér yfir þessari mynd, ég er dálítill krakki í mér.

Þetta er ein af bestu teiknimyndum sem ég hef séð, ásamt Toy Story 2. Söguþráðurinn í myndinni er mjög góður og miðað við teiknimynd þá var hún nokkuð flott. ÉG MÆLI HIKLAUST MEÐ ÞESSARI.

20th Century Fox hefur lengi reynt að koma sér inn á teiknimyndamarkaðinn sem Disney hefur stjórnað svo lengi sem elstu menn muna. Fyrsta alvörutilraunin var Anastasia, sem var svona la-la, en núna ætluðu þeir svo sannarlega að taka þetta með trompi með Titan A.E. Myndin var að sögn rándýr, og það sést í nokkrum sérlega vel gerðum tölvuteiknuðum atriðum, en það sárvantar eitthvað til að lyfta þessu upp á sama plan og t.d. Aladdin eða The Lion King. Sennilega er það veikur söguþráðurinn. Illar geimverur eyða jörðinni og þeir sem eftir lifa þurfa að leita að geimskipinu Titan A.E. sem er KANNSKI til og getur KANNSKI bjargað mannkyni. Hinn ungi Cale (Matt Damon) er "eina vona mannkynsins" því hann er með kortið að Titan greipt í lófann. Hann fær flugmanninn Akimu (Drew Barrymore), "hetjuna" Korso (Bill Pullman) og hóp mislyndra geimvera til að hjálpa sér í leitinni, en þau þurfa jafnframt að forðast geimverurnar sem vilja ekkert frekar en að kála þeim. Þetta er svolítið Star Wars-legt allt saman. Unga hetjan, gáfaða stúlkan, eldri vinur hetjunnar, illt afl sem vill eyða plánetunni þeirra... jújú, maður kannast við þetta. En Titan A.E. er sko engin Star Wars, og það er vandinn. Þrátt fyrir margar flottar senur, sérstaklega vetnistrén og ískristallana, veldur myndin vonbrigðum. Sem betur fer fengu leikstjórarnir hæfileikafólk á við Janeane Garofalo, Nathan Lane, John Leguizamo, og Hank Azaria til að lesa nokkrar raddirnar; hæfileikar þeirra gera myndinni heilmikið gott. En hún stendur samt engan veginn undir væntingum. Því miður.

Skemmtileg og að flestu leiti vel gerð geimteiknimynd sem fjallar um síðustu leifar mannkynsins 15 árum eftir að jörðin var sprengd í tætlur af geimverum. Þó að um teiknimynd sé að ræða er ekki þar með sagt að þetta sé barnamynd, hún var til að mynda bönnuð innan 13 ára í USA og inniheldur ýmislegt sem maður myndi aldrei sjá í Disney mynd. Útlitslega séð er myndin dálítið misleit - sum atriði fannst mér hreint ekki nógu flott og hreyfingar aðalpersónanna (sem eru handteiknaðar) eru langt frá því að vera nógu mjúkar. En að því fráskildu koma alveg ótrúlega vel gerð atriði þess fyrir utan, sérstaklega undir lokin. Notuð er samblanda af þrívíddartölvugrafík og handteikningum en gallinn við þetta er að það stingur dálítið í augun hversu skilin þarna á milli eru skörp. Söguþráðurinn er þokkalega frumlegur þannig séð og margar góðar hugmyndir og framandi staðir koma fyrir í myndinni. Reyndar er persónusköpun í lágmarki en atburðarásinni er haldið gangandi nógu hratt til þess að það verði ekki of stór galli. Niðurstaðan er því að hér er um hreint ágæta mynd og fína afþreyingu að ræða.