The Prince of Egypt (1998)

The Prince of Egypt er einstaklega vel heppnuð teiknimynd. Hún er það besta sem sent hefur verið síðan The Lion King var gerð. Teikningarnar eru hreint einstakar, leikraddirnar óaðfinnanlegar og öll umgjörð glæsileg. Sagan er náttúrulega alþekkt og kemur furðulega vel út í teiknimyndaformi. Það sem virkar samt við þessa mynd umfram allt annað er samband bræðranna, bæði sem vinir og óvinir. Báðir eru þeir sterkir persónuleikar sem umhverfið mótar. Annar lifir í hóglífi og velsæld og gengur allt í haginn á meðan hinn lifir í fátækt og örbyrgð en fær tækifæri á að frelsa alla Gyðinga úr Egyptalandi. Myndin er líka mun meiri stórmynd en t.d. Mulan þótt hún sé líka góð. Bestur af aukaleikurum finnst mér vera Jeff Goldblum sem kemur ótrúlega vel út sem bróðir Móse. Einnig er tónlistin í myndinni betri en hún hefur verið á undanförnum árum enda eftir þá sömu og gerðu The Lion King. Endirinn þegar Móses færir Rauðahafið í sundur er ógleymanlegur. Í alla staði mjög vel gerð og skemmtileg teiknimynd.

Sagan af því þegar Guð kallaði Móse til að leiða lýð sinn út úr þrældóminum í Egyptalandi til fyrirheitna landsins er sígild. Enda þótt þessi teiknimyndaútfærsla eigi meira skylt við Cecil B. DeMille en II. Mósbók, er hún vel af hendi leyst og ætti að reynast flestum gyðingum, kristnum og múslimum ásættanleg. Það er full ástæða til að færa sögur Biblíunnar á hvíta tjaldið, enda er kvikmyndin það listform, sem nýtur hvað mestra vinsælda meðal almennings nú á dögum, og ritningin er hafsjór menningarlegra gullkorna, sem allir ættu að kunna skil á.

Þessi magnaða teiknimynd hefur farið sannkallaða sigurför um heiminn frá útgáfu hennar árið 1998, enda eru allir gagnrýnendur og áhorfendur sammála um að hún sé ein sú besta teiknimynd sem gerð hefur verið. Hún er snilldarlega teiknuð og skrifuð, spennandi, fyndin og með söguþræði sem heldur áhorfendum á öllum aldri hugföngnum frá upphafi til enda. Ekki skemmir hin stórkostlega tónlist fyrir en aðallag myndarinnar, "When You Believe" í flutningi Mariah Carey og Whitney Houston, hlaut óskarinn 1998 sem besta kvikmyndalag ársins. Myndin "The Prince of Egypt" er byggð á meistaraverki Cecil B. DeMille, "The Ten Commandments" eða Boðorðin 10 sem var gerð árið 1956 með óskarsverðlaunaleikurunum Charlton Heston, Yul Brynner og Anne Baxter í aðalhlutverkum og er þessi mynd byggð á handriti þessarar óviðjafnanlega kvikmyndastórvirkis um Móse. Hér segir frá tveimur bræðrum sem hafa hlotið misjöfn örlög í vöggugjöf. Annar er konungsborinn og er honum ætlað að taka við stjórntaumum lands síns þegar fram í sækir. Hinn er talinn munaðarleysingi og þeir eru fáir sem vita hið sanna í málinu. Þessir tveir drengir alast upp sem bestu vinir og bindast ævarandi trúnaðarböndum sem enginn mun nokkurn tíma geta slitið. En tíminn líður og drengjunum eru ætluð misjöfn örlög. Annar verður einráður í einu mesta heimsveldi sem sagan greinir frá en hinn verður andlegur leiðtogi þjóðar sinnar sem berst við að losa sig undan völdum og yfirgangi hástéttarinnar. Þetta veldur því að bræðurnir verða andstæðingar bæði í orði og á borði og á milli þeirra hefst barátta sem allir óttast að geti haft hræðilegar afleiðingar. Þar með er hafin hin mikilfenglega saga sem er í senn bæði spennandi og örlagarík og mun örugglega heilla alla áhorfendur á hvaða aldri sem er, bæði sem ævintýri og sem afar vönduð og góð kvikmyndagerð. Ógleymanleg skemmtun sem skilur mikið eftir sig og er hreint ógleymanleg. Ég ráðlegg þeim sem enn hafa ekki séð Egypska prinsinn "The Prince of Egypt" að drífa í því hið snarasta. Þetta er meistaralega vel gerð mynd sem gleymist seint þeim sem hana sjá. Alls ekki missa af þessu meistaraverki DreamWorks-kvikmyndafyrirtækisins!!

Einstaklega vel gerð teiknimyndaútfærsla af biblíusögunni um Móses. Að vissu leiti svipar myndin svoldið til Disney teiknimyndar en mér finnst samt Disney ekki hafa sent frá sér neitt með eins vandað í langan tíma. Teikningarnar í myndinni eru einstaklega vel gerðar og er blandað saman handteiknuðum og tölvuteiknuðum hlutum svo að útkoman verði sem glæsilegust. Söguþráðurinn er líka þannig að myndin höfðar meira til fullorðinna heldur en margar aðrar teiknimyndir. Þeir leikarar sem tala fyrir aðalpersónurnar eru líka ekki í lakari kantinum, þar ber helst að nefna Val Kilmer, Ralph Fiennes og Michelle Pfieffer. Ég mæli með þessari mynd fyrir alla.