Skálmöld og Sinfóníuhljómsveit Íslands (2013)

Eins og vel er kunnugt hélt víkingarokksveitin Skálmöld þrenna tónleika í Eldborg fyrir fullu húsi í lok nóvember, í samstarfi við Sinfóníuhljómsveit Íslands, Karlakór Reykjavíkur, Kammerkórinn Hymnodiu og barnakór Kársnessskóla. Viðtökurnar voru vægast sagt stórkostlegar og gagnrýnendur jafnt sem áhorfendur yfir sig hrifnir. Mynd- og hljóðupptaka er væntanleg í verslanir þann 17. desember næstkomandi, og verður vísast í fjölmörgum jólapökkum þetta árið. Hinum allra hörðustu gefst þó tækifæri á að taka forskot á sæluna, því efnt verður til bíósýningar á herlegheitunum þann 15. desember. Tónleikarnir verða sýndir í heild sinni, en þeir spanna rétta tvo klukkutíma. Tæknileg gæði verða eins og best gerist og hvergi til sparað.