Njálssaga (2003)

Fyrri hluti Njálssögu er um hálftíma langur leikinn þáttur byggður á hluta úr Brennu-Nálssögu. Þar segir frá því þegar Hallgerður langbrók lætur stela mat á Kirkjubæ og kinnhestinum sem hún fékk að launum frá Gunnari. Í kjölfarið fylgja deilur Gunnars við Otkel á Kirkjubæ og Skammkel ráðgjafa hans. Lýkur þeirra viðskiptum svo að Gunnar drepur báða. Seinni hlutinn er hálftíma löng heimildamynd þar sem leikir og lærðir draga fram sitthvað athyglisvert um þennan hluta sögunnar. Þeir eru; Arthúr Björgvin Bollason, Ármann Jakobsson, Bjarki Bjarnason, Bjarni Ólafsson, Hlín Agnarsdóttir, Jón Böðvarsson, Jón Karl Helgason, Katrín Jakobsdóttir, Kristján Jóhann Jónsson, Kristrún Heimisdóttir, Pétur Gunnarsson og Ragnhildur Richter.