I'm Still Here (2010)

Árið 2008 tilkynnti Joaquin Phoenix, margverðlaunaður leikari og ein af ástsælustu stjörnum hvíta tjaldsins, að hann væri hættur að leika í kvikmyndum og hefði ákveðið að snúa sér að tónlistarferli í staðinn. Kvikmyndaunnendur um allan heim stóðu á öndinni og biðu í ofvæni eftir því að sjá hvort hann stæði við það, sem hann gerði svo sannarlega – eða hvað? Hann fór brátt að koma fram á litlum tónleikum þar sem hann afhjúpaði sig sem rappara, en þeir tónleikar fóru vægast sagt illa, Joaquin virtist bæði veruleikafirrtur og algerlega hæfileikalaus, lenti meira að segja í slagsmálum við áhorfendur, auk þess sem fréttir fóru að berast af undarlegri hegðun hans í kringum tónleikana. Var þetta kannski bara gabb?