Rescue Dawn (2006)

Dieter Dengler hafði átt sér þann draum að fljúga orrustuflugvél síðan hann var barn í stríðshrjáðu Þýskalandi, og átti sá draumur stóran þátt í ákvörðun hans um að verða orrustuflugmaður bandaríska hersins þegar fjölskylda hans fluttist vestur yfir hafið. Í fyrstu ferð hans fyrir herinn þá er flugvél hans skotin niður yfir Laos í suðaustur-Asíu. Þar er hann hnepptur í ánauð af asískum skæruliðum, en þrátt fyrir að hann átti sig á alvarleika kringumstæðnanna þá neitar hann að þóknast þeim á nokkurn hátt. Hann er brátt fluttur í litlar fangabúðir og hittir þar fyrir hermenn sem eru í misjöfnu andlegu ástandi. Dengler ætlar sér þó ekki að hanga lengi í herbúðunum og fer strax að undirbúa flótta sinn og meðfanga sinna, og hefst þá ein ótrúlegasta flóttasaga allra tíma, en myndin er gerð eftir sönnum atburðum.