The Longest Yard (2005)

Fór á þessa mynd um daginn um von á góðri Adam Sandler bíómynd. En því miður fékk ég ekki ósk mína uppfyllta. Þessi mynd var frekar slöpp, fannst mér. Hún var svona allt í lagi til að byrja með en með tímanum þá fékk maður alveg nóg. Sagan í myndinni er ekki góð, leikur hjá leikurunum fannst mér engan veginn góður og þetta er ekkert nýtt fyrir mér. Sama gamla Hollywood formúlan. Þannig að því miður verð ég að gefa þessari mynd falleinkunn.

Já ég fór á þessa mynd síðastliðinn föstudag, ekki með neinar stórar væntingar frá Adam Sandler. En já myndin byrjaði og þar komu inn nokkrar góðar senur og eins og áður sagði stefndi allt í góða mynd. Mér fannst hún halda áfram skemmtileika sínum en já það hefði vel mátt stytta hana kannski aðeins þarna allt sem fór fram í fangelsinu þó svo það hafði mörg góð atriði að geyma. Adam Sandler brást mér ekki í þessari mynd ef ég á að vera fullkomnlega hreinskilinn en ég sá hinsvegar aldrei myndina með Burt Reynolds, þannig kannski þetta hafa bara verið nýtt fyrir mig. Mér finnst hún alls ekki vera lík Waterboy þó svo þar var myndin einning um ruðning. Ég gef myndinni þrjár stjörnur af fjórum mögulegum.

Adam Sandler er ágætis grínisti, og fjandi góður leikari þegar hann fær hlutverk sem leyfir honum að sýna það. En grínmyndirnar úr smiðju hans eru annars komnar í svo mikla fjöldaframleiðslu að þetta er löngu hætt að vera eitthvað ferskt eða jafnvel skemmtilegt. Sandler átti góða spretti með Billy Madison, Happy Gilmore og The Wedding Singer. Ég skal jafnvel ganga svo langt með að segja að ég hafði gaman af Anger Management. En þessir titlar sem eftir sitja (Big Daddy, Little Nicky o.s.frv.) fóru allir í vaskinn. Með The Longest Yard gerir hann sama og ekkert nýtt. Þetta er endurgerð á samnefndri Burt Reynolds-mynd frá 1974 sem hefur fengið smá uppfærslu í nútímann. Hún fjallar um ameríska fótboltann, sem sýnir að Sandler hefur farið þennan veg áður (The Waterboy dettur í hugann), sama gildir með þessa mynd sem endurgerð, og ég mun seint fyrirgefa honum fyrir slátrun hans á Mr. Deeds Goes to Town. Reyndar er þetta ekki fyrsta endurgerðin. Fyrir nokkrum árum síðan gerðu bretar sína tilraun til að láta knattspyrnuna spilast inn í nákvæmlega sömu sögu með myndinni Mean Machine. Sú mynd var reyndar heldur litlaus og auðgleymd, en þó mun skárri en þessi tjara. Formúlan er í raun sú sama. Munurinn er bara sá að hún er krydduð hinum skrautlega en því miður afar dæmigerða ''Adam Sandler-húmor,'' sem verður seint talinn eitthvað sérstaklega fágaður. Kynþáttabrandarar, skot á kynfæri (bókstaflega!), samkynhneigða, feitt fólk, hobbita, nefnið það! Þessi mynd hefur nóg af þessu. Það er samt lítið við þessu að segja því ekkert af þessu er eitthvað sérstaklega fyndið. Sandler hefur alltof lengi spilað með þennan sama húmor aftur og aftur með sífellt þreyttum endurtekningum. Ég hef heldur aldrei fílað amerískan ruðning sem íþrótt, og kannski segir það meira um minn smekk heldur en þessa mynd. En senurnar í lokin á úrslitaleiknum voru frekar óspennandi og jafnvel frekar teygðar. Ég beið bara eftir að þessu myndi ljúka því myndin var orðin nógu löng nú þegar (109 mínútur?! Ég held að það sé svolítið overboard). Það eina sem olli glotti hjá mér var nærvera Chris Rocks. Hann átti vafalaust bestu línurnar, en þær hefðu annars vel mátt vera fleiri. Burt Reynolds er einnig þarna í skemmtilegu aukahlutverki, sem er nokkuð skondin miðað við það að hann stóð áður í sporum Sandlers fyrir 30 árum síðan, en þá í margfalt betri mynd. Það er ekki mikið sem ég þarf að bæta við. Ég hef lengi kvartað undan þessum grínmyndum Sandlers og ''gæðum'' þeirra, samt fer ég alltaf á þær. Af hverju? Í smá bjartsýni fullyrði ég það að ég hef ekki enn misst fulla trú á Sandler, þar sem að hann hefur sannað að hann geti MUN betur. Eftir að hafa séð hann í Punch-Drunk Love og Spanglish er hálf vont að sjá hann misstíga sig svona. En jæja, meðan það er enn fólk úti sem skemmtir sér konunglega yfir þessu rugli þá veit ég að hann er a.m.k. að gera eitthvað rétt. Sjáum til hvað skeður næst...3/10

Mér finnst þessi mynd bara hrein snilld, Mér finnst þetta vera besta mynd Adam sandlers og síðan var Chris rock góður en mér fannst Nelly lang svalastur og ég hef aldrei fýlað hann neitt. En mér fannst hún klikkaðslega góð og ráðlegg öllum að fara á hana :)

Þetta er ágæt mynd ég get ekki sagt að hún sé góð enn hún er nálægt því. Myndinn byrjar mjög vel og allt stefnir í þrusu mynd enn svo fer hún að dala og verður dálítið langdreginn á köflum. Mér fannst svolítið skrítið að sjá Adam Sandler sem algjöran nagla sem leifir sér hvað sem er, maður er vanur að sjá hann fyrir sér sem þessi misheppnaða týpa enn hann tók sig bara ágætlega í þessu hlutverki. Chris Rock er mjög góður í þessari mynd, svo er alltaf gaman að sjá Rob Scheider koma inn í myndirnar sem Aadam Sandler leikur í. Enn ég verð að seigja það að þessi mynd er með þeim betri íþróttamyndum sem ég hef séð. Myndinn fjallar bara um það að Adam Sandler er hent inn í fangelsi og tekur þar við rugby liði og myndinn snýst bara um það. Annars er fínn húmor í myndinni og það er hægt að hlægja þó nokkuð af henni.