Duplex (2003)

Mér finnst alveg fáranlegt að gefa þessari mynd 4 stjörnur þar sem hún er ófyndin og alveg gjörsamlega leiðinleg. Ég kvarta ekki undan leikurunum heldur brandarnir eru á við 3 ára krakka. Ég er ennþá ekki að skilja að Danny De Vito leikstýrði henni því hann er snillingur og hér var hann örugglega ekki alveg viss hvað hann væri að gera. Ég gef henni 1 stjörnu því að leikararnir voru svo sem að gera ágæta hluti en myndinn er algjör hryllingur. Mæli alls ekki með henni, takið frekar bara Pósturinn Pál á spænsku eða eitthvað.

Danny DeVito leikstýrir kvikmyndinni Duplex og skilar af sér miðlungsgamanmynd. Maður hefði búist við mun meiru en því miður varð það ekki raunin. Duplex fjallar um parið Alex Rose (Ben Stiller) og Nancy Kendricks (Drew Barrymore). Alex er rithöfundur og Drew vinnur hjá stóru tímariti. Þau finna draumaíbúðina og flytja inn. Íbúðin er tvíhæða en á efri hæðinni býr Mrs. Connelly (Eileen Essel), gömul og afskapleg indæl kona, eða það er hún allavega til að byrja með. Mrs. Connelly leigir efri hæðina og leigusamningurinn kveður á um að Alex og Nancy mega ekki hreyfa við gömlu konunni. Ekki líður á löngu þar til sú gamla er farin að gera hinu hamingjusama pari lífið leitt, þau geta ekki sofið, þau fá ekki frið, lögreglan er daglegur gestur o.s.frv. Að lokum gefast þau upp og snúa vörn í sókn með skelfilegum afleiðingum. Duplex byrjar mjög vel og húmorinn hittir í mark en eftir því sem líður á verður myndin langdregin og endurtekningarsöm. Sömu brandararnir eru margnotaðir og verða því afskaplega þreyttir. Duplex er eins og allt of langur gamanþáttur sem byrjar mjög vel en missir svo flugið og brotlendir allillilega í lokin. Duplex er miðlungsmynd sem rétt nær að halda sér í miðjumoðinu.

Mikil vonbrigði sem þessi mynd var.

Þegar myndin var hálfnuð þá var ég farinn að líta á klukkuna og geyspa.

Hugmyndin að myndini er góð en hún er samt eitthvað svo fyrirsjáanleg. Ágæt mynd til að horfa á heima í tv þegar ekkert annað er að gera, en ekki eyða peningum í bíó á hana.

Ég brunaði á þessa alveg hreint ágætu mynd núna um daginn, og varð ekki fyrir vonbrigðum, gerði mér ákveðnar væntingar og þær stóðust alveg fullkomnlega. Ben Stiller hefur nú áður verið í svipuðum hlutverkum, t.d. í Meet The Parents og There´s something about Mary og passar bara fínt í þetta, stendur alvef fyrir sínu. Sú sem hins vegar stendur upp úr hjá mér er Drew Barrymore, mér hefur alltaf fundist hún hálf leiðinleg, alla vega ekki standa undir orðspori sem góð leikkona en hérna stendur hún alveg fyrir sínu og er bara nokk góð. Ekki má svo gleyma hryllingnum á efri hæðinni, sem leikin er af Eileen Essel held ég að hún heiti, svona pain in the ...... þið vitið hvað ég á við og eru atriðin með henni oft á tíðum frábær. Nú myndin fjallar um par sem er að kaupa sína fyrstu íbúð og lítur hún vel út og allt í lukkunar standi með það en gallinn er sá að með íbúðinni fylgir gömul kona sem er með samning um að vera þarna áfram. Og myndin snýst svo um það hvernig hún fer meira og meira í taugarnar á ungu hjónunum þangað til á endanum að þau reyna með alls konar ráðum að losa sig við hana með skrautlegum og oft á tíðum sársaukafullum árangri. Í heildina þá er þetta svona grín/rómó mynd og alveg þess virði að eyða 2 tímum af helginni í að horfa á hana.

Allþokkaleg gamanmynd undir öruggri leikstjórn Danny Devito´s sem er nú reyndar enginn snillingur þrátt fyrir að hafa gert ágæta hluti um dagana. Segir í stuttu máli frá pari(Ben Stiller og Drew Barrymore)sem flytur í nýja og rúmgóða íbúð en sá böggull fylgir skammrifi að þau sitja uppi með gamla konu sem býr á efri hæðinni ásamt páfagauki. Kerla gerir vinum okkar lífið leitt með hávaðasömu sjónvarpi og útsmognum leiðum til að fá þau til að erindast fyrir sig og ekki líður á löngu þar til okkar einlæg eru orðin fullsödd á þessu veseni og grípa til ýmissa örþrifaráða. Ben og Drew eru mjög góð saman, má greina svolítinn neista á milli þeirra og ættu þau tvímælalaust að leika saman aftur. Húmorinn er ekkert af nýrri nálinni en það má samt hlæja að honum á köflum. Það sem hífði myndina yfir meðallag er kannski aðallega endirinn sem var þó óvæntur. Ég ætla ekki að segja meira um Duplex en ég mæli með henni. Fín skemmtun.

Ég hef alltaf haft gaman af Ben Stiller sem leikara og Danny DeVito sem leikstjóra. Ég bjóst við prýðilegri afþreyingu, jafnvel einhverju svörtu í stíl við seinustu mynd Devito's, hina vanmetnu Death to Smoochy, en ég hefði svosem mátt vita betur. Duplex er ekkert annað en einhæfur, smekklaus gamanfarsi sem missir marks með nánast öðrum hverjum brandara. Hugmyndin er óneitanlega skemmtileg, og það hefðu verið margar leiðir til að láta hana ganga betur upp. Þetta hefði getað orðið yndislega nasty mynd, með kolsvörtum undirtóni, en einhverra hluta vegna virkar hún bara svo leiðinlega væg og létt, sem á engan veginn við söguna (svo tala ég nú ekki um þennan asnalega ''happy'' endi, sem passaði alls ekki við restina af myndinni). Það sem nær þó að halda einhverju gamni uppi er Ben Stiller, enda er maðurinn vel kunnugur við hlutverk þar sem hann gerir sjálfan sig að fífli. Hins vegar er það Eileen Essel sem ber myndina með prýði í hlutverki leigjandans, og eignar sér hvern einasta ramma sem hún er í. Ég get alls ekki mælt með þessari mynd, og þá alls ekki fyrir bíósalinn. Þetta gæti orðið ágætis vídeó-afþreying ef það er nákvæmlega EKKERT annað að gera. En það er víst bara mitt álit, dæmið sjálf...4/10

Ég verð að segja að Duplex er öðruvísi en ég bjóst við, en alls ekki verri, reyndar betri!

Myndin er um ung hjón, nýbyrjuð að ganga tröppur lífsins. Þau flytja inn í notalegt duplex í Brooklyn, með gamla konu á efri hæðinni! Gamla konan hafði nefnilega átt heima þarna mjög lengi og var ekki á leiðinni að flytja út.

Ungu hjónin sætta sig að lokum við þetta, eftir mikinn vafa, og ákveða að barnið þeirra (sem þau hafa ekki átt enn, ekki einu sinni búið til) muni spjara sig ágætlega með gömlu konuna uppi.

Ekki líður á löngu, þar sú gamla fer að fara í hjónanna fínustu með allskonar óskum um að lagnirnar hjá henni verði lagaðar, sorpið tekið út (ekki jafn auðvelt og það hljómar) og ýmislegt fleira.

Myndin væri nú ekki, ef ekki til allrar ólukkunnar á meðan þessu stendur, kæmi. Sem dæmi; að finna nærbuxur fyrir slysni í rusli þeirrar gömlu og verða ranglega ásakaður um pervertaskap oftar en einu sinni. Brátt fer þetta svo mikið í þau ungu að þau fara að gera róttæk plön um að koma þeirri gömlu burtu, en það reynist hægara sagt en gert.

Mér fannst þessi mynd algjört æði. Ef þú ert að leita að góðri mynd, ekkert vera að spá sérstaklega í þessari. Ef þú ert að leita að skemmtilegri mister-bín mynd, sjáðu þessa!

Allir leikararnir standa sig geysilega vel; Ben Stiller og Drew Barrymore passa yndislega vel sem ungu hjónin, og Eileen Essel er mjög skemmtileg sem sú gamla, hún leikur ekki hlutverk sem krefst mikilla leikhæfileika, en hefur það sem þarf.

Ekki vonast eftir góðri mynd, vonist eftir æðislega skemmtilegri mynd.

Takk fyrir mig, Einar.