Bowling for Columbine (2002)

Þessi mynd er örugglega besta heimildarmynd sem hefur verið gerð!! Micheal Moore er ótrúlega fyndinn í þessari mynd um vopnaburp kana. Eins og þið vitið er Micheal á móti amerísku ríkisstjórninni og öðrum amerískum stórfyrirtækjum. Í myndinni kom teiknimynd sem er frá gaurunum sem gerðu South Park sem var frekar fyndinn. Ef þið hafið áhuga á hemildarmyndum verðið þið að horfa á þessa.

Ótrúlega góð grín og heimildamynd eftir Michael Moore. Hún fékk Óskarinn og fjallar um hvað ameríkanar nota mikið af byssum,hvað kvikmyndir hafa áhrif á lítil börn og margt fleira. Algjört meistaraverk og Moore talaði meðal annars við þungarokkarann Marylin Manson og fékk teiknimyndaklippu frá gaurunum sem gerðu South Park.

Bowling For Columbine er besta heimildarmynd sem ég hef nokurtíman séð. Þessi mynd sínir hvað fólk getur verið mismunandi. Það er talað um skotárásir í skólum í bandaríkjunum í þessari heimildarmynd t.d. yngsta morð í skóla þar sem stelpan sem var myrt var aðeins 6 ára. Eitt atriði sem stendur út úr myndini er þegar hann fer yfir til Kanada frá Bandaríkjunum þegar hann er í Kanada þá spyr hann fult af fólki hvort þau læsi útidyrahurðum heima hjá sér ef mig minnir rétt þá sagðist eingin af því fólki sem hann talði við læsa útidyrahurðum meðan fólk í Bandaríkjunum er með alskonar varnir á hurðunum sínum extra lása og keðjur. Munurinn er fáránlegur miðað við hvað það er stutt á milli þessara staða. En vill bara segja það ef þú ert ekki búinn að sjá þessa mynd þá mæli ég með að þú legir hann eða kaupir hana einfaldlega því að ég get lofað þér því að þú verður ekki fyrir vonbrigðum.

Engin furða að þessi að þessi mynd fékk Óskarinn. Moore fjallar um byssur Ameríkana og hvað þeir eru háðir byssum og þegar unglingar fara að herma eftir tölvuleikjum og skjóta úr byssum í skólum. Líka að einn 6 ára strákur fann byssu frá frænda sínum og skaut aðra stelpu í skólanum.

Þessi mynd endurspeglar hið ameríska hugarfar og hve heimskt það er. Michael Moore er að gera góða hluti fyrir sig og ameríku með þessari heimildarmynd, gerir Charlton Heston að vonda karlinum sem er formaður byssueigenda samtaka U.S.A

mjög gott framtak sem lætur engann ósnortinn

Heimildamyndir eru misáhugaverðar. Flestar fjalla þær um áhugavert viðfangsefni enda held ég að fáir myndu horfa á heimildamynd um tilhugalíf brekkusnigla eða eitthvað annað álíka (alls ekki nein sneið til þeirra sem það gera í alvörunni). Ekki er nóg að hafa viðfangsefnið áhugavert, maður þarf að kunna að segja rétt frá því. Enginn gerir meira lifandi, frísklegri og áhugaverðari heimildamyndir heldur en Michael Moore. Hann er gífurlega gagnrýninn á vestrænt og þá sérstaklega bandarískt samfélag og gerir það alltaf á skemmtilega háðskan hátt. Auk þess fjalla myndir hans um eitthvað sem snertir okkur einmitt á þessari stundu. Nýjasta mynd hans, Bowling for Columbine, fjallar um og reynir að útskýra hina gengdarlausu byssueign Bandaríkjamanna. Bowling for Columbine toppar fyrri myndir hans sem þó voru allar frábærar. Hún er hrein og tær snilld, frá upphafi til enda.

Það sem ég hef helst heyrt kvartað yfir er að hinn tveggja stunda sýningartími myndarinnar sé einum af langur. Mér fannst það ekki þar sem að Moore kemur með frábæra punkta, hvern á eftir öðrum svo það er hrein unun að horfa á það á tímabili.

Þrátt fyrir allt eitrað háðið sem Moore dembir bæði yfir því sem gerist ásamt sumum viðmælenda sinna er stutt í alvöruna. Til að undirstrika það fáum við að sjá upptökur öryggismyndavéla af blóðbaðinu í Columbine-háskólanum þar sem tveir skólastrákar myrtu fjölda samnemenda sinna. Það eru ekki ýkja fallegar myndir. Auk þess er mikil sorg út af mörgum öðrum tengdum hlutum og gífurleg reiði í garð þeirra afla sem leynt og ljóst stýra fjölmiðlum og öðrum öflum í landinu til að ala á ótta og þar með ala á byssueign.

Moore talar við ýmsa karaktera og koma þeir misvel út og eru misvel áhugaverðir. Marilyn Manson og Matt Stone (annar South Park gauranna) koma best út. Þetta er dæmi um tvo einstaklinga sem hlutum er venjulega klínt á (bæði í Bandaríkjunum og hér heima einnig) þegar eitthvað hörmulegt gerist, eins og morðin í Columbine-skólanum. Báðir svara þeir að mínu mati framúrskarandi gáfulega fyrir sig og koma með marga góða punkta. Einnig er síðan hreint eitruð athugasemd frá Chris Rock í uppistandsupptöku sem við sjáum.

Þeir sem koma hins vegar illa út, fyrir utan einhverja hálfgeðveika byssuóða rauðhnakka (rednecks) sem Moore talar við, eru menn eins og Charlon Heston, formaður NRA sem stendur fyrir National Rifle Association. Moore gerir hann að algjöru fífli í dýrlegu viðtali undir lok myndarinnar og gegnumlýsist þá algjörlega málflutningur samtaka eins og hans en hann er gjörsamlega innantómur og rangur.

Þetta er mjög mikilvæg mynd fyrir fólk að sjá, sérstaklega unglinga sem eru að fara að pæla í hlutunum. Hér fá þeir að sjá sjónarhorn manns sem er ekki stjórnað af áróðursmaskínu stóru fjölmiðlanna. Að mínu mati besta og mikilvægasta mynd ársins.

Bowling For Columbine er áhugaverð mynd sem ég mæli með að sem flestir fari að sjá. Myndin tekur á atriðum sem skipta miklu máli úti í Bandaríkjunum og í rauninni í heiminum öllum. Af hverju eru Bandaríkjamenn eins og þeir eru?



Spurt er af hverju Bandaríkjamenn virðast oftar reyna að leysa málið með vopnum, bæði innanlands, og þá er bennt á hinn gríðarlega fjölda morða sem framin eru í Bandaríkjunum [með byssum] á hvert og fyrir utan landssteinana en þá er talað um allan þann fjölda landa sem Bandaríkin hafa lagt í rúst eða átt hluta í að leggja í rúst eða hafa áhrif á þróun.



Bowling For Columbine hlaut Óskarinn sem besta heimildarmyndin og átti það vel skilið. Michael Moore hefur verið nokkuð gagnrýndur fyrir þessa mynd og hefur verið skrifað efni um að hann hafi leikið sér um of með klippignar og breytt því sem fólk var að segja. Að því sem ég hef lesið um það þá virðist hann ekki hafa gert svo mikið af því.



Annars, ég mæli endilega með því að þú skellir þér í bíó [eða út á vídeóleigu] og náir þér í þessa mynd sem fyrst.

Michael Moore er einstaklega athyglisverður kvikmyndagerðamaður; skemmtilegur, markviss, fyndinn og gjörsamlega óhræddur við að segja skoðanir sínar. Ég hef lengi haft áhuga fyrir heimildarmyndum hans, Roger and Me og The Big One fannst mér t.d. alveg þrælgóðar. Hins vegar slær Bowling for Columbine þær báðar út tvímælalaust. Að gera verkefni um byssueignir Bandaríkjanna og blanda í málið alvarleg mál eins og Columbine fjöldamorðin auk nokkurra álitsmála um stjórnmál er ekki eitthvað sem hver annar maður myndi treysta sig í að gera (hver myndi t.d. þora að abbast upp á Charlton Heston??). Moore er mjög djarfur varðandi verk sitt og gengur stundum mjög langt, en niðurstaðan er bara nánast snilld. Bowling for Columbine er einhver áhugaverðasta heimildarmynd sem ég hef nokkurn tímann séð, og sömuleiðis ein alskemmtilegasta. Það er alveg stórmagnað hvernig hún kafar út í hin alvarlegustu mál sem og þau sem eru nánast bara eins og persónulegt djók hjá Moore. Umræðuefnin eru misáhugaverð, en langt flest þeirra vekja mann til umhugsunar. Og jafnvel þótt maður sé ekkert endilega alltaf sammála skoðunum Moore's þá er óneitanlegt að hann dragi fram góðar athugasemdir. Bowling For Columbine er að mínu mati skylduáhorf og ég skora á langflesta til að kíkja á hana.8/10

Michael Moore er einhver frumlegasti og skemmtilegasti kvikmyndagerðarmaður Bandaríkjanna í dag. Það sem hann gerir hafa sumir kallað heimildamyndir, en það er nú reyndar frekar tæpt. Hann er alltof mikið fyrir sviðsetningar og einhliða fréttamennsku til þess að það sé hægt að kalla hann hlutlausan heimildamyndagerðarmann. Það sem hann gerir, og gerir frábærlega, er að finna sér eitthvað sem hann er óánægður með eða hefur vakið mikið umtal, og finna einhverjar nýjar hliðar á málinu. Hingað til hefur hann aðallega verið að berjast við stórfyrirtækin í Bandaríkjunum, líkt og hann gerði með hinum frábæru Roger & Me og The Big One, en í þetta sinn ákvað hann að takast á við byssumenninguna í Bandaríkjunum. Gerði hann það í kjölfarið á fjöldamorðunum í framhaldsskólanum í Columbine sem gerðust fyrir nokkrum árum síðan. Hann tekur viðtöl við nemendur í skólanum, Charlton Heston (formann byssusamtakanna NRA), og ótalmarga fleiri. Meðal annars talar hann við Marilyn Manson, en fjölmiðlar í Bandaríkjunum hafa kennt honum um morðin. Einnig veltir hann því fyrir sér hvers vegna Kanadamenn, sem eiga svipað margar byssur á íbúa og Bandaríkjamenn, nota þær samt ekki til þess að myrða hvern annan. Í einu orði sagt er þessi mynd ekki bara frábær, heldur ótrúlega tímabær á þeim tímum þegar daglega berast nýjar fréttir frá Bandaríkjunum að einhver hafi gengið af göflunum og myrt mann og annan með skotvopnum. Þrátt fyrir að myndin veki upp fleiri spurningar en hún svarar, þá fær hún mann allavega til þess að hugsa. Það er nógu sjaldgæft í dag til þess að öllum er ráðlagt að kíkja á þessa þegar þeir geta.

Michael moore leikstjóri er fjallar í þessari mynd um byssueignir Bandaríkjamanna og einnig hið hræðilega slys sem átti sér stað í Columbine skólanum í Bandaríkjunum fyrir nokkrum árum. Hann tekur viðtöl við menn innan NRA samtakanna og spyr spurninga eins og t.d. afhverju það deyja svona margir af höndum skotvopna í Bandaríkjunum miðað við önnur lönd sem eru með álíka mikið af skotvopnum í umferð. Frábærlega gerð mynd í alla staði, skemmtileg á köflum en jafnframt mjög alvarleg. Mynd sem kemur manni til að hugsa, sem að allir þurfa að sjá og enginn má láta framhjá sér fara.