K-PAX (2001)

Kevin Spacey leikur hér geimveruna Prot sem kemur til jarðar frá plánetunni K-pax. Hann er umsvifalaust lagður inn á geðsjúkrahús og talar þar við lækninn Mark(Jeff Bridges). Ýmsar rannsóknir eru gerðar á Prot og að lokum fer Mark að trúa því að Prot sé í raun geimvera. Að mínu mati er þetta ekki nógu góð mynd. Áhugaverð reyndar og Jeff Bridges er skemmtilegur að vanda en myndin er alltof róleg og boðskapurinn er frekar óljós ef einhver er á annað borð. Myndin er ekki alslæm en ég get ekki sagt að ég hafi verið yfir mig hrifinn.

Myndin fjallar í stuttu máli um geðlækni sem fær til meðferðar náunga sem kallar sig Prot og segist vera frá plánetu sem heitir K-PAX. Í fyrstu líta læknirinn og annað fólk á geðspítalanum á Prot sem hvern annan geðsjúkling en áður en langt um líður kemur í ljós að það er eitthvað sérstakt við hann. Jeff Bridges leikir geðlækninn og skilar hreint ágætri frammistöðu en senuþjófurinn er hinn frábæri leikari Kevin Spacey sem Prot. Ég hef dálítið blendnar tilfinningar gagnvart þessari mynd, hún er vissulega góð afþreying og inniheldur marga góða punkta en jafnframt því hefur hún holur í söguþræðinum sem er erfitt er að líta framhjá þegar til baka er horft. Það má deila um hversu stórar þessar holur eru, en þær fóru ekki mikið í taugarnar á mér fyrr en ég fór að hugsa út í þær eftir að hafa séð myndina og eyðilögðu því upplifunina ekki. Þegar öllu er á botninn hvolf vega kostir K-PAX upp galla hennar og er hún því vel þess virði að sjá. Hún er vel leikin, myndataka og tónlist eru fyrsta flokks ásamt því sem söguþráðurinn er ansi góður þegar hann nær sér á flug.

Ég bjóst við miklu þegar ég labbaði inn í bíósalinn á þessa mynd í Bíóhöllinni gær. Trailerarnir höfðu lofað góðu og hún hafði fengið ágæta dóma.


Áður en myndin hófst komu 4 trailerar. Fyrstu þrír af þeim (Hearts in Atlantis, Enigma og Spy Game) voru ekki með neinu tali heldur bara tónlist af einhverri píkupopp útvarpsstöð sem ég var mjög fúll með. Hljóðið kom svo á síðasta trailernum af Heist.



Myndin fjallar um Prot (Kevin Spacey) sem segist vera geimvera frá plánetunni K- PAX. Að sjálfsögðu er hann settur á geðveikrahæli fyrir að segja það við lögregluna. Uppáhaldsmatur Prot eru ávextir en þeir eru mjög líkir matnum á K-PAX. Hann borðar þá reyndar á allt öðruvísi hátt en mennirnir gera. Á geðveikrahælinu trúir náttúrulega enginn honum (nema geðsjúklingarnir) en þeir virðast ekki komast nálægt því að sanna fyrir honum að hann sé jarðarbúi. Prot er svo látinn í tíma hjá Dr. Mark Powell (Jeff Bridges), sálfræðingi og verða þeir mjög nánir.

Prot verður einnig mjög vinsæll meðal geðsjúklinganna sérstaklega þegar hann segist geta læknað þá...... og vinsældir hans aukast enn meira þegar hann segist geta tekið einn jarðarbúa með sér heim aftur til K- PAX. Dag einn ákveður Dr. Powell að fara með Prot með sér í geimvísindastofnunina. Þar verða geimsérfræðingarnir heillaðir af honum vegna þess hvað hann veit mun meira en þeir um himingeiminn. Okey nú skrifa ég ekki meir því það eiga væntanlega margir eftir að sjá þessa mynd........


Kevin Spacey sýndi enn einu sinni frábæran leik á hvíta tjaldinu. Jeff Bridges lék einnig mjög vel en ekki nærri jafn vel og Kevin.

Það er alveg sama hvað Kevin Spacey tekur sér fyrir hendur, hann sýnir afburðaleik í öllum myndunum sínum enda er það ekki skrýtið að hann hefur fengið tvenn Óskarsverðlaun, fyrst fyrir besta aukaleik karlleikara í The Usual Suspects og síðan fyrir aðalleik karla í American Beauty.

Að auki leikur hinn frábæri Jeff Bridges með honum í myndinni. Myndinni hefur verið líkt við Once Flew Over The Cuckoo&8217;s Nest og Starman. Myndin er í leikstjórn hins breska Iain Sofley.

Kevin Spacey leikur Prot, dularfulla persónu sem allt í einu birtist á brautarpalli Central Station. Hann er ranglega tekinn fastur fyrir vasaþjófnað. Lögreglumenn ákveða að senda hann á geðsjúkrahús eftir að hafa yfirheyrt hann. Prot vill meina að hann sé gestur frá plánetunni, K-PAX. Dr. Mark Powell (Jeff Bridges) tekur sjúklinginn Prot að sér. En hvort Prot sé í raun framandi vera eða mennskur á eftir að koma í ljós og það er í raun kostur myndarinnar, því undir lokin eru það áhorfendur einir sem verða að gera það upp við sig.

Framleiðandi myndarinnar er enginn annar en, Lawrence Gordon sem framleitt hefur stórmyndir á borð við Die Hard, Field of Dreams, Aliens og Broadcast News.

Afar traust og vel leikin mynd sem þó vantar ákveðinn neista sem myndi gera hana frábæra. Kevin Spacey sannar enn og aftur að hann er einn albesti leikarinn í bransanum í dag, og Jeff Bridges nær loksins að draga sig upp úr þeirri ládeyðu sem hann hefur verið staddur í árum saman. Samleikur þeirra í myndinni er hrein unun að fylgjast með og nær að sumu leyti að hylja þá staðreynd að myndin er frekar götótt. Það koma afar dauðir kaflar í myndinni inn á milli og endirinn gengur frekar brösulega fyrir sig. Þetta er engu að síður með skárri myndum sem hafa komið frá draumaverksmiðjunni í ár, og er tæknilega afar vel unnin. Hún er afar vel tekin og rennur frekar ljúflega áfram. Ég verð engu að síður að segja að tónlistin í myndinni er ekki góð, einhvers konar synthapopp fílingur er í gangi, og passar hann engann veginn við þá stemmingu sem reynt er að skapa í myndinni. Einnig verður að segjast að Mary McCormack, þrátt fyrir að vera í afar litlu hlutverki, veldur því samt engann veginn og getur alls ekki leikið stúlkan. Þrátt fyrir þessa galla er hér um að ræða vel gerða mynd, frekar á vitrænum nótum, þar sem tveir leikarar fara á kostum. Þetta nægir til þess að vel er hægt að mæla með myndinni.

K-PAX er skemmtilega óvænt mynd þar sem Kevin Spacey sannar í hundraðasta sinn hvað hann getur leikið snilldarlega, og ég myndi segja að það væri ekkert réttlæti í þessum heimi ef hann fengi ekki aðra Óskarstilnefningu. Það verður pottþétt annaðhvort þessi eða The Shipping News (þar sem hann á víst að standa sig jafn vel ef ekki betri). Mótileikari hans, Jeff Bridges stendur líka fyrir sínu sem sálfræðingurinn með endalausu efasemdirnar. K-PAX er enginn venjulegur vísindaskáldskapur, þetta er mun frekar vísindadrama. Kjarni myndarinnar er bara spurningin hvort að aðalpersónan sé geimvera eður ei, en svarið kemur ekki í ljós fyrr en nær lokin. Besti kosturinn við þessa áhugaverðu mynd er að hún verður aldrei langdregin eða dauð, þrátt fyrir að virka afar lágstemmd og ómerkileg út frá trailerum. Það er voðalega sjaldgæft þegar mynd af svona tegund verður aldrei langdregin einhvern tímann á köflunum. Mér fannst hún allavega ekki langdregin, þó að öðrum muni eflaust finnast það. Spacey nær að halda hverri einustu senu uppi með stórskemmtilegum einræðum sem hann heldur og hann nær því ekki bara vel, heldur er hann bara svo trúverulegur að hann nær fullkomlega að sannfæra mann. Tónlistin er líka alveg hreint yndisleg. Veiki partur myndarinnar er samt hvað klisjan í lokin verður áberandi. K-PAX er bara mjög góð byrjun á nýja árinu (þó að hún hafi komið út á síðasta ári vestanhafs). Svo er bara stóra spurningin þessi: Er Prot geimvera eða bara einn óvenjulegur sjúklingur með minnisleysi? - Farið á myndina og sjáið bara sjálf.8/10

Góð mynd sem hefur það fram yfir aðrar myndir að hún fellur ekki beint í þann haug mynda sem gerður er, heldur er hún ein af þessum sem þú manst eftir. Samleikur Kevin Spacey og Jeff Briges kemur vel út og svo og leikur annara. Þessi mynd er dæmi um vel heppnaða mynd sem lætur þó ekki of mikið fara fyrir sér heldur er hérna perla sem leynist inn á milli í öllu ruslinu sem Hollywood mokar yfir okkur.

Það gerist æ sjaldnar þessa dagana að maður gengur út úr bíósalnum og hugsar með sér: Djöfull var þetta góð mynd! Þetta var nákvæmlega það sem ég hugsaði eftir að hafa séð K-PAX, eina langbestu mynd ársins hingað til. Það er ekki síst að þakka Kevin Spacey, sem er að mínu mati snillingur sem getur ekki slegið feilnótu. Hann er hreint út sagt stórkostlegur í þessari mynd, og getur farið að búa sig undir Óskarstilnefningu í febrúar næstkomandi, hvort sem það verður fyrir þessa mynd eða The Shipping News. Hann leikur Prot, sem er sendur á geðsjúkrahús eftir að hann segist vera geimvera frá K-PAX. Hann er sendur til geðlæknis (Jeff Bridges) í meðferð, en smám saman kemur í ljós að Prot gæti meira en vel verið sá sem hann segist vera. Hann sér útfjólublátt ljós, getur útskýrt hreyfingar fjarlægra pláneta, og virðist geta breytt lífi fólks í kringum sig án þess að lyfta litla fingri. Hann hefur jákvæð áhrif á alla sem hann kemur nálægt, og læknirinn sjálfur er síður en svo undantekning þar. Hann fær Prot á heilann, og verður að komast til botns í málinu áður en sjúklingurinn fer aftur til K-PAX. Ekki beint flóknasti söguþráður allra tíma, en þessi mynd er alveg einstaklega vel gerð. Hún verður aldrei væmin og heldur manni við efnið allan tímann. Það spillir ekki fyrir að gamla góða Ísland kemur aðeins við sögu. Eins og áður sagði er Spacey ótrúlegur, sem fyrr. Þessi maður getur tekið hvaða hlutverk sem er og fengið einhvers konar verðlaun fyrir það. Bridges gæti vel átt von á tilnefningu sjálfur. Hann er að skila sínu besta í mörg ár hér, og er ekki ókunnur þessum efnivið eftir að hann lék í Starman (1984). Leikstjórinn Iain Softley (Backbeat, Wings of the Dove) þarf lítið að gera með svona gæðaleikara. Tónlistin eftir Edward Shearmur er mjög óvenjuleg fyrir svona mynd, og er satt að segja frábær. Þessi mynd fær mann til að trúa að Hollywood geti enn gert góðar myndir. Þegar öllu er á botninn hvolft skiptir það ekki máli hvort Prot er geimvera frá K-PAX eða bara óvenjulegur geðsjúklingur; á hvorn veginn sem er gerir hann það sem hann þarf að gera. Ef ekki væri fyrir endi sem ég er ekki 100% sáttur við fengi þessi mynd fullt hús.