Analyze This (1999)

Paul Vitti (Robert De Niro) er höfuðpaur einnar stærstu mafíufjölskyldu New York borgar. Eftir að hann verður fyrir skotáras verður hann sífellt fyrir kvíða- og óttaköstum. Hann leitar þá til sálfræðingsins Ben Sobel (Billy Crystal). Ben er heiðarlegur borgari sem vill ekkert við hann gera en neiðist til að lækna hann. Þegar Paul fær köst lætur hann ná í Ben sama hvað hann er að gera og nær í hann um nætur og í brúðkaup. Einnig er tilvonandi eiginkonu (Lisa Kudrow) Ben meinilla við þennan nýja sjúkling hans.

Robert De Niro er alveg ótrúlega góður í hlutverki mafíósans og sannar hér að jafn góður grínleikari og alvarlegri leikari. Billy Crystal er heldur ekki síðri í hlutverki sálfræðingsins. Lisa Kudrow sést ekki það mikið í myndinni og er það skömm miðað við hvað hún er brilliant grínleikona.

Harold Ramis (Groundhog Day) stendur sig með eindæmum vel og er þessi mynd hans ekki síðri en Groundhog Day.

Analyze This er stórskemmtileg grínmynd og mæli ég með að þið sjáið De Niro og Crystal í S- inu sínu.

Ágætis gamanmynd, svona hálfpartinn af gamla skólanum, en er að mestu leyti borin uppi af aðalleikurunum tveim. Ekki beint frumleg, en ágætis skemmtun sem ætti að höfða til flestra og víða kaflar þar sem menn eiga auðvelt með að skella uppúr.

Paul Vitti (Robert De Niro) er sennilega öflugasti mafíuforingi New-York borgar. En eftir að hann er næstum því drepinn í árás þá fer hann allt í einu að brotna niður andlega. Hann leitar því ásjár sálfræðingsins Bens Sobols (Billy Crystal). Ben er meinilla við það að fá Paul inn í líf sitt enda er hann stórhættulegur glæpamaður, skapillur og með eindæmum uppáþrengjandi. Þegar hann dettur niður í þunglyndisköstin er Ben alltaf látinn koma, jafnvel þó það sé niðdimm nótt. Það sem flækir málin enn frekar er að Ben er að fara að giftast unnustu sinni (Lisa Kudrow), Alríkislögreglan grunar hann um að vera í innsta hring mafíunnar og risastór mafíufundur er í bígerð þar sem allir foringjarnir munu hittast svo það er eins gott fyrir Ben að hafa læknað Paul fyrir þann tíma. Robert De Niro sannar hér enn einu sinni að hann er einn besti leikari í heiminum og fer hreint frábærlega með hlutverk sem hann gjörþekkir út og inn en þarf nú að gera á öfugum forsendum. Fer hann á algjörum kostum og er fullkomlega trúverðugur. Þetta sannar fyrir mér a.m.k. að hann getur sennilega leikið hvað sem er og gert það allt jafn vel. Billy Crystal styður hann dyggilega sem sálfræðingsuppinn sem veit ekkert hvernig hann á að vera í kringum Paul og fleiri hans líka og er skíthræddur um að hann verði drepinn mjög bráðlega út af þessari vitleysu. Þó að Robert De Niro og Billy Crystal séu kannski alveg eins fyndnir saman og Robert De Niro og Charles Grodin í Midnight Run þá fara þeir samt á kostum báðir. Leiðinlegast er að sjá Lisu Kudrow hafa ekkert að gera. Miðað við hvað hún er hæfileikarík gamanleikkona þá finnst mér að Harold Ramis hefði getað leyft henni að eiga nokkrar fyndnar línur. Handritið er stútfullt af bröndurum sem hitta oftast beint í mark, sérstaklega þegar Billy Crystal þarf að þykjast vera "consigliere" fyrir framan alla mafíósana. Það er samt ekki bara brandarar heldur er hugsun á bak við þetta allt saman og það er heilsteypt. Leikstjórn Harold Ramis er með ágætum og er þetta næstbesta mynd sem ég hef séð eftir hann (sú besta myndi vera sú frábæra Groundhog Day). Mjög fyndin og skemmtileg mynd semsagt með De Niro og Crystal í toppformi.

Það er hinn frábæri leikari, leikstjóri og handritshöfundur Harold Ramis "Ghostbusters, Groundhog Day, Multiplicity" sem er höfundur þessarar sprenghlægilegu myndar þar sem tveir af bestu leikurum Bandaríkjanna, þeir Robert De Niro og Billy Crystal fara á algjörum kostum í hlutverkum sínum. De Niro leikur hér mafíósann Paul Vitti, tilvonandi guðföður einnar valdamestu mafíufjölskyldu New York-borgar. Hann hefur alist upp í faðmi fjölskyldunnar, lært öll þau handbrögð sem þarf til að stjórna starfseminni og er tilbúinn til að axla ábyrgðina á forystuhlutverki sínu þegar hann fer skyndilega og óvænt að finna til svimandi óttaeinkenna. Hann gerir sér grein fyrir því að hann á við einhvers konar geðrænt vandamál að stríða sem hann verður að losna við áður en hann tekur við krúnunni. Hann er jú maður sem á að vekja ótta, ekki upplifa hann sjálfur. Bob Sobel "Crystal" er fráskilinn sálfræðingur sem hefur ekki hugsað sér að klífa til metorða heldur reyna að búa sér eins kyrrlátt líf og hann getur, jafnvel þótt það kosti að hann geti ekki valið sér viðskiptavini og verði að sætta sig við það sem er að hafa hverju sinni. Af einskærri tilviljun haga atvikin því svo að Paul Vitti leitar til Sobel með þá einföldu kröfu að hann lækni hann af ofsóknarbrjálæðinu áður en allar mafíufjölskyldur landsins komast að því hvers kyns er. Í fyrsta sinn á ævinni stendur Vitti nefnilega frammi fyrir vandamáli sem verður hvorki leyst með byssu né sementi. Nema auðvitað ef Sobel mistekst að lækna hann! Ógleymanleg mynd sem er þriggja og hálfrar stjörnu virði. Alls EKKI missa af þessari mynd!!

Frábær skemmtun. Vel leikin, gott handrit. Hvað er hægt að biðja um meira?? Gaman að sjá Níróinn í þessu hlutverki sem gerir grín að þeim hlutverkum sem hann hefur oft leikið frábærlega. Hann er ekki síðri gamanleikari en dramaleikari. Cristalinn er fínn í þessari mynd líka, alveg hnökralaus. Lísa litla (vinur) það reynir lítið á hana, er svona meira til skrauts. Einnig er gaman að sjá þarna einn frægan B-mynda leikara sem aldrei hefur leikið í almennilegri mynd. En hér verður enginn svikinn, frábær skemmtun.

Þessi gamanmynd um alræmdan mafíuforingja, sem leggur óheppinn sálfræðing í einelti með vandamál sín, er ágætt stundargaman en skilur lítið eftir sig. Robert De Niro og Billy Crystal standa sig báðir vel.

Þessi mynd er frábær best alvöru grínmynd sem gerð hefur verið, Billy Crystal og Robert De Niro eru frábærir, skellið ykkur á þessa í bíói eða takiðhana þegar hún kemur á vídeó ef þið nennið að bíða.

Þessi mynd var allt í lagi en ekkert sérstök. Robert De Niro var frábær að vanda, Billy Crystal ágætur en sonurinn langskemmtilegasta persónan. Myndin var ekkert mjög fyndin en ágætis skemmtun engu að síður.

Vel heppnuð grínmynd sem segir frá mafíuforingjanum Paul Vitti (Robert DeNiro) sem lendir í sálarkreppu einn daginn og leitar hjálpar hjá sálfræðingi nokkrum að nafni Ben Sobol(Billy Crystal). Sálfræðingurinn er í upphafi hræddur við Paul þar sem hann er þekktur mafíumeðlimur og þorir því ekki að neita honum um aðstoð þó honum sé meinilla við að fá Paul inn í líf sitt. Það verður síðan fastur liður að í hvert skipti sem Paul líður illa er Sobol sóttur (eða rænt í sumum tilfellum) og fyrir vikið flækist líf Sobols talsvert, sérstaklega þar sem hann er að fara að giftast unnustu sinni (Lisu Kudrow úr Friends). Það er skemmst frá því að segja að það er nóg af skondnum uppákomum í myndinni og áhugavert að sjá hvernig samband þessara ólíklegu félaga þróast. Þrátt fyrir að þetta sé grínmynd fer hún ekki of létt í hlutina og það er talsvert lagt í söguþráð, samtöl og persónur. Útkoman er fínasta skemmtun sem ætti ekki að valda vonbrigðum.