Fyrstu myndirnar af leikaranum Tom Hanks í gervi Walt Disney hafa verið birtar, en eins og sést á meðfylgjandi mynd skartar Hanks yfirvararskeggi til að líkjast Disney meira.
Bíómyndin sem Hanks er hér að leika í heitir Saving Mr. Banks, og fjallar um gerð bíómyndarinnar Mary Poppins.
Í myndinni leikur breska leikkonan Emma Thompson P.L. Travers, höfund sögunnar um barnfóstruna fljúgandi Mary Poppins. Colin Farrell, Paul Giamatti, Jason Schwartzman, B.J. Novak, Bradley Whitford og Rachel Griffiths leika einnig í myndinni.
Tökur myndarinnar hófust í september í Los Angeles og hún er væntanleg í bíó 20. desember 2013.
