Írski leikarinn Liam Neeson stimplaði sig endanlega inn sem einn mesti töffari kvikmyndanna í spennumyndinni Taken sem kom út árið 2008. Nú fáum við að sjá fyrsta plakatið fyrir næstu mynd meistarans, en hún mun bera heitið Unknown.
Í Unknown, sem er byggð á skáldsögu eftir hinn franska Didier van Cauwelaert, fer Neeson með hlutverk læknis sem lendir í bílslysi í Berlín. Þegar hann vaknar eftir vist á spítala kemst hann að því að kona hans þekkir hann ekki. Það sem verra er virðist annar maður hafa stolið lífi hans. Þegar yfirvöldin stimpla hann brjálaðan og dularfullur morðingi hefur að elta hann verður læknirinn góði að taka örlög sín í eigin hendur og komast til botns í málinu.
Unknown lendir í kvikmyndahúsum snemma á næsta ári, en með önnur hlutverk fara Diane Kruger, January Jones og Aidan Quinn.
– Bjarki Dagur
