Gagnrýnendur tjá sig: Evil Dead Burn sögð grimmasta mynd kvikmyndaflokksins hingað til
Aðdáendur hrollvekjumynda hafa ástæðu til að gleðjast. Fyrstu viðbrögð við hryllingsmyndinni Evil Dead Burn, nýjasta kaflanum í hinni goðsagnakenndu Evil Dead-seríu, hafa verið birt og ef marka má þá sem þegar hafa séð myndina er hér á ferðinni einn grimmasti og óvægnasti hrollur sumarsins.
Myndinni er leikstýrt af Frakkanum Sébastien Vaniček (Infested), sem virðist hafa sett sér það markmið að færa seríuna út á ystu mörk hryllingsins. Margir gagnrýnendur lýsa myndinni sem „stanslausri martröð“, „algjörlega miskunnarlausri“ og jafnvel þeirri ofbeldisfyllstu í sögu Evil Dead. Á sama tíma segja þeir að hún haldi í svartan húmorinn sem hefur alltaf verið
órjúfanlegur hluti af seríunni.
Peter Gray segir myndina vera „illgjarnan og ofbeldisfullan hrylling sem gæti jafnvel móðgað suma áhorfendur“, á meðan Bill Bria telur hana hugsanlega vera „grimmustu mynd seríunnar hingað til“. Simon Thompson lýsir henni einfaldlega sem „alvarlega sjúkri og algjörri martröð“ og mælir sérstaklega með því að áhorfendur sitji eftir yfir lokatitlunum.
Sagan fjallar um konu sem leitar skjóls hjá tengdaforeldrum sínum eftir að eiginmaður hennar deyr. Það sem á að vera sorgarstund breytist hins vegar fljótt í sannkallaða fjölskyldumartröð þegar Necronomicon-bölvunin tekur yfir húsið og fjölskyldumeðlimir breytast hver af öðrum í Deadites.
Þrátt fyrir að myndin sé sjálfstæð saga leggur Vaniček mikla áherslu á að virða arfleifð Evil Dead. Bruce Campbell, sem gerði Ash Williams ódauðlegan í upprunalegu myndunum, hafði aðeins eina ósk þegar þeir leikstjórinn ræddu verkefnið: að bera virðingu fyrir því sem gerði seríuna að því fyrirbæri sem hún er í dag.
Vaniček segir Campbell hafa viljað vernda „barnið sitt“ og að hann hafi verið fullkomlega sammála þeirri nálgun. Einnig naut hann stuðnings leikstjórans og framleiðandans Sam Raimi, sem gerði upphaflegu myndina, sem gaf listrænt frelsi en var ávallt til staðar ef ráðlegginga var þörf.
Evil Dead Burn (2026)
8/10 Evil Dead Burn á Íslandi verður frumsýnd fimmtudaginn 9. júlí næstkomandi og ef fyrstu viðbrögðin reynast rétt gæti hún orðið ein umtalaðasta hryllingsmynd ársins. Að minnsta kosti virðist ljóst að aðdáendur mega búa sig undir mikinn óhug, ógeðfelldar senur og blóðuga skemmtun sem ýtir Evil Dead-seríunni enn lengra út fyrir þægindarammann.
Heimildir: JoBlo, Slashfilm, Movieweb ofl.
