Í febrúar sl. fór af stað orðrómur um mögulega framhaldsmynd af hinni geysivinsælu Disney teiknimynd Frosinn, eða Frozen, þegar forstjóri Disney, Bob Iger gaf í skyn að hugsanlega væri hægt að gera myndina að seríu. Í apríl voru þessar væntingar tónaðar niður þegar forstjóri Walt Disney Studios sagði að menn vildu frekar einbeita sér að sviðsuppfærslum af myndinni, frekar en framhaldsmynd. Núna hefur hinsvegar orðið breyting á ef eitthvað er að marka aðalstjörnu Frozen myndarinnar, Idina Menzel, sem lék snædrottninguna Elsu, en hún segir að framhaldsmynd sé í vinnslu og hún vonist til að leika í henni.
Breska blaðið The Telegraph spurði leikkonuna um hvað hún gæti sagt um mögulegt framhald og sviðsuppfærslur af Frozen, og hún svaraði á þá leið að; „Þetta er allt í vinnslu!“.
Þetta þýðir þó ekki að Menzel sé að fara í búning snædrottningarinnar sjálfrar á sviði: „Jú, algjörlega …. ekki sviðsuppfærsluna samt, ég veit ekki hvað mun gerast með það, en vonandi myndina. Sjáum hvað setur.“
Fyrir áhugasama þá má lesa viðtalið við Menzel í heild sinni hér á The Telegraph.