Gamanmyndin The Other Guys með þeim Will Ferrell og Mark Wahlberg sló heldur betur í gegn í kvikmyndahúsum, en leikurunum virðist hafa komið vel saman því þeir munu leiða saman hesta sína á ný. Verkefnið sem varð fyrir valinu er gamanmyndin Turkey Bowl, en hún fjallar um tvo smábæjarmenn sem eru með amerískan fótbolta algerlega á heilanum.
Þeir stofna báðir sitthvort liðið og etja síðan kappi, en það er fátt sem þeir myndu ekki gera til að bera sigur úr býtum. Handritið er skrifað af þeim Scott Silvery og Robert Carlock sem hafa getið sér gott nafn með þáttunum 30 Rock, en Adam McKay mun framleiða. Ekki er vitað hvort McKay muni sömuleiðis leikstýra Turkey Bowl, en hann hefur meðal annars leikstýrt Anchorman sem og The Other Guys.
