Fyrsta stiklan úr íslensku spennuþáttaröðinni Elmu er komin út, en þættirnir verða frumsýndir í Sjónvarpi Símans Premium 15. október næstkomandi.
Serían er byggð á glæpasögunni Marrið í stiganum eftir Evu Björgu Ægisdóttur. Unnur Birna Backman fer með hlutverk rannsóknarlögreglukonunnar Elmu Jónsdóttur og Nikulás Hansen Daðason leikur einnig eitt af aðalhlutverkum.
Sagan fylgir Elmu þegar hún snýr aftur á æskuslóðir sínar á Akranesi eftir áfall í Reykjavík. Hún vonast eftir rólegra lífi á Skaganum, en fljótlega dregst hún inn í rannsókn sem tengist gömlum leyndarmálum bæjarins og hvarfi átta ára stúlku 25 árum áður.
Birkir Ágústsson, framkvæmdastjóri miðla hjá Símanum, segir í tilkynningu að Marrið í stiganum sé sterkur grunnur að spennandi íslenskri þáttaröð. Andri Ómarsson hjá Glassriver segir að bækurnar um Elmu hafi komið út í hátt í tuttugu löndum og vonast til að serían geti ferðast jafn víða.
Elma er framleidd af Glassriver í samstarfi við Símann og Mediawan.
Hægt er að horfa á stikluna með því að smella á þennnan hlekk: Vísir.
