Morgan Freeman sagði á Facebook síðu sinni í gær að hann væri sprelllifandi, og alls ekki dauður, en af og til hafa blossað upp umræður um að leikarinn sé látinn. „Eins og Mark Twain, þá er ég alltaf að lesa um það að ég sé látinn,“ skrifaði hinn 75 ára gamli Freeman. „Ég vona að þessar sögur séu ekki réttar…en ef þær væru það, þá tilkynni ég hér með glaður að lífið eftir dauðann er nákvæmlega eins og þegar ég var á lífi.“
Freeman segist sjálfur vera í Las Vegas að vinna við myndina Last Vegas með Michael Douglas, Robert De Niro og Kevin Kline, sem fjallar um fjóra eldri menn sem halda steggjapartý i Sin City fyrir þann sem er nú að verða síðastur þeirra til að gifta sig.
Myndin kemur í bíó í desember 2013.
