Fox kvikmyndaverið hefur fundið leikara í hlutverk Dr. Dauða, eða Dr. Doom eins og hann heitir á frummálinu, í endurræsinguna á Fantastic Four ofurhetjumyndinni. Leikarinn heitir Toby Kebbell.
Dauði er erkióvinur ofurhetjugengisins frækna, og heitir fullu nafni Victor von Doom.
Leitin að Dauða hefur staðið yfir í þónokkurn tíma, og hafa menn eins og Jack Huston og Domhnall Gleeson verið nefndir í hlutverkið, áður en Dawn of the Planet of the Apes leikarinn Kebbell, fannst. Samningur er þó enn óundirritaður.
Helstu leikarar aðrir í Fantastic Four eru Miles Teller, Kate Mara, Michael B. Jordan og Jamie Bell.
Myndin verður byggð á teiknimyndasögunni The Ultimate Fantastic Four, og mun fjalla um persónurnar þegar þær eru ungar.
Von er á myndinni í bíó 19. júní 2015. Mynd númer tvö mun svo koma sumarið 2017, samkvæmt Variety kvikmyndaritinu.