Við höfum sagt reglulega fréttir hér á kvikmyndir.is af nýju Tom Cruise myndinni Edge of Tomorrow, sem áður hét All You Need is Kill.
Á Comic-Con hátíðinni í San Diego nú um helgina voru birt glæný plaköt fyrir myndina þar sem þau Tom Cruise og meðleikkona hans í myndinni Emily Blunt, sjást grá fyrir járnum í einhversskonar bardagabúningum:
Myndin gerist í nálægri framtíð. Geimverur hafa komið niður á Jörðina og gert árás og milljónir manna hafa dáið. Engin her er tiltækur á Jörðinni sem ræður við skrímslin, og nú er komið að ögurstundu í baráttunni við innrásarherinn. Cruise leikur hershöfðingja sem aldrei hefur lent í stríði, og er umsvifalaust hent í djúpu laugina í bardaga, og er drepinn eftir nokkrar mínútur. En það skrýtna gerist að hann vaknar aftur og aftur í það helvíti sem þetta stríð er, á sama deginum í sama bardaganum, og þarf að deyja, aftur og aftur, og aftur. Það góða við það er að hann verður alltaf betri og betri í hvert sinn sem hann vaknar aftur til lífsins, og þar með hæfari í að takast á við geimverurnar.
Leikstjóri er Doug Liman. Myndin verður frumsýnd í Bandaríkjunum 6. júní 2014.
