Halle Berry, sem eins og frægt er orðið, rölti fáklædd upp úr sjónum sem persónan Jinx Johnson í James Bond myndinni Die Another Day árið 2002, er að öllum líkindum aftur á leið inn í heim alþjóðlegrar njósnastarfsemi.
Berry á nú í viðræðum um að leika CIA leyniþjónustumann á móti Taron Egerton í Kingsman 2, samkvæmt heimildum The Hollywood Reporter.
Leikstjórinn, Matthew Vaughn, er þessa dagana á fullu við að undirbúa myndina, en fyrri myndin, Kingsman: The Secret Service, sló óvænt í gegn, og þénaði meira en 414 milljónir Bandaríkjadala um allan heim árið 2015.
Berry má næst sjá í spennutryllinum Kidnap, sem frumsýnd verður í Bandaríkjunum 13. maí nk.