Batman filman er 270 kíló!

Myndin hér fyrir neðan sýnir IMAX filmuna fyrir The Dark Knight Rises. Aðeins örfáar filmur af þessari tegund eru til, en þær eru notaðar í sérstökum IMAX kvikmyndahúsum sem bjóða upp á mun betri upplausn og gæði heldur en venjuleg kvikmyndahús. Filman er í raun einstök þar sem langflest IMAX kvikmyndahús í Bandaríkjunum munu sýna myndina stafrænt í stað þess að keyra hana á filmu, en stafrænar IMAX sýningar bjóða ekki upp á sömu gæði.

Eins og þið sjáið er filman RISI, en hún er rúm 270 kg að þyngd. The Dark Knight Rises inniheldur 72 mínútur af atriðum sem tekin voru upp á IMAX tökuvél, samanborið við rúman hálftíma í The Dark Knight.

Fyrir þá sem ekki vita þá eru IMAX upptökuvélarnar mun stærri, þyngri og erfiðari meðferðar en venjulegar tökuvélar. Þær bjóða upp á meira ,,detailed“ skot og eru oft notaðar í náttúruheimildarþáttum- og myndum. Það að The Dark Knight Rises sé tekin upp að hluta til með IMAX tækni þýðir að við megum eiga von á flennistórum skotum yfir borgir, landsvæði ásamt allt öðruvísi kvikmyndaupplifun í þeim hasaratriðum sem tekin eru upp með IMAX. IMAX kvikmyndahúsin bjóða einfaldlega upp á allt aðra upplifun en þeirri sem við eigum að kynnast, en skýringarmyndin hér fyrir neðan útskýrir stærðarmuninn ansi vel.

Fyrir þá sem vilja fræðast meira um það hvernig Nolan notar IMAX tæknina í The Dark Knight Rises þá mæli ég með þessum lestri (slappið af, þetta er eins spoiler free og hægt er).