Kvikmyndin XL, sem leikstýrt er af Marteini Þórssyni, var sýnd í gær á Karlovy Vary kvikmyndahátíðinni í Tékklandi. Hátíðin er ein sú elsta í heiminum og er svokölluð „A“ hátíð en ekki nema 14 kvikmyndahátíðir í keppnisflokki fá að bera þann stimpil. Er það því mikill heiður að vera valin til þátttöku í aðalkeppni á hátíðinni.
„Frábær stemning og æðislegar viðtökur. Frábær dómur í Huffington Post en ögn neikvæðari í Hollywood Reporter. Rosalega mikið af viðtölum og nú er önnur sýning að fara í gang. Það voru 1200 manns á sýningu í gær en það verða 800 manns í dag. Sýningin í dag verður samt ekki á réttum tíma vegna þess að Oliver Stone er að valda einhverri seinkun. Við munum svo svara spurningum áhorfenda eftir sýningu.“ sagði Marteinn hæstánægður í samtali við kvikmyndir.is
Leikkonan María Birta virðist einnig vera ánægð með móttökurnar á hátíðinni í Tékklandi og setti inn færslu á Facebook í gær eftir sýningu. „Jiminn eini. Er í skýjunum yfir viðtökunum á myndinni! Fólkið hérna er frábært og margir búnir að koma og segja okkur sýna skoðun sem hefur bara verið jákvæð! Búin með nokkur viðtöl og q&a, rauða dregilinn, pre-party og undirskriftir. Þá er það bara lokaparty dagsins!! Ég skil ekkert hvað er í gangi hérna og er vægast sagt í spennufalli – gerði mér kannski ekki alveg grein fyrir því hvað þetta er stórt dæmi og mikill heiður.. Sem er kannski bara ágætt.. Var nógu og stressuð fyrir.“
XL fjallar um þingmanninn Leif Sigurðarson sem er neyddur í áfengismeðferð af vini sínum og félaga, forsætisráðherra Íslands. Áður en farið er í meðferð ákveður Leifur að halda eitt heljarinnar partý sem fer gjörsamlega úr böndunum.
