Fyrsta plakatið er komið fyrir Nymphomaniac ( ísl. þýðing: sjúklega vergjörn kona ) nýjustu mynd danska leikstjórans Lars von Trier.
Plakatið er mjög einfalt eins og sjá má hér fyrir neðan, og ekki laust við erótík:
Helstu leikarar í myndinni eru Charlotte Gainsbourg, Stellan Skarsgård, Shia LaBeouf, Jamie Bell, Stacy Martin, Christian Slater, Uma Thurman, Willem Dafoe, Connie Nielsen, Udo Kier og Jean-Marc Barr.
Myndin fjallar um miðaldra kynlífssjúkling sem segir eldri piparsveini alla kynlífssögu sína, eftir að hann finnur hana barða og illa á sig komna í húsasundi. Slater leikur föður Joe, sem hún sér einungis í endurliti aftur í tímann. Myndin er villt og ljóðræn saga af erótískri vegferð konu, frá fæðingu og þar til hún er orðin 50 ára gömul. Konan, Joe, sem hefur sjálf greint sig sem sjúklega vergjarna, segir sögu sína í myndinni.
Á köldu vetrarkvöldi þá kemur gamall og heillandi piparsveinn, Seligman, sem leikinn er af Skarsgård, að Joe þar sem hún liggur slösuð í húsasundi eftir að hafa verið barin til óbóta. Hann fer með hana heim í íbúð sína þar sem hann hjúkrar henni á meðan hann spyr hana út í líf hennar. Hann hlustar með athygli á það þegar hún fer yfir 8 mismunandi kafla í lífi sínu, sem er margskipt og þar sem margt fólk kemur við sögu.
Ef þú „skrollar“ aðeins með músinni á heimasíðu myndarinnar er lofað meiru þann 16. maí nk. – og spurning hvort fyrsta stiklan sé væntanleg þann dag …
