Mikil eftirvænting ríkir vegna næstu X-Men myndar, eða X-Men: Days of Future Past. Bryan Singer mun snúa aftur í leikstjórastólinn og hefur safnað að sér flest öllum stjörnuleikurum fyrri myndanna. Má þar nefna Hugh Jackman, Jennifer Lawrence, Patrick Stewart, Ian McKellen, James McAvoy og Michael Fassbender. Samkvæmt Deadline Hollywood hefur þó nýlega bæst við þetta fríða föruneyti en Emmy verðlaunahafinn Peter Dinklage mun samkvæmt heimildum Deadline fá að spreyta sig í þessari næstu X-Men kvikmynd Bryan Singer.
Þótt menn kannist kannski ekki við nafnið, Peter Dinklage, þá hafa eflaust flestir séð hann oftar en einu sinni á sjónvarpsskjánum en hann leikur einmitt Tyrion Lannister í sjónvarpsþáttunum Game of Thrones.
Hvort harðkjarna áhangendur X-Men myndanna verði ánægðir með þessa viðbót eður ei, mun eflaust koma í ljós en gangi áætlanir eftir mun myndin líta dagsins ljós sumarið 2014.